233 ki dkhot ka HNLC, ba wan pyndem ha ka sorkar

Shillong, 21 Rymphang: Kat kum ka repod ba la ioh na ka tnad kam pohiing ka jylla, ki don 233 ngut ki dkhot ka seng beain HNLC kiba la wan ban pyndem haduh mynta tang naduh u snem 2000. Na kine, 12 ngut ki dkhot ki dei ki kynthei kiba la wan aiti noh ialade ha ka bor jong ka ain.
Hynrei, kaba lyngngoh ka long ba kane ka tnad kam pohiing ka jylla, ka la pyni ba kam don jingtip ne jingkhein eiei ia ki dkhot ka seng kiba shah siat iap ha ki bor jong ka ain.
Ia kane ka jingtip, la ioh da ka jingwad jingtip lyngba ka ain RTI, na kane ka tnad. “Ka tnad kam ioh jingtip katno ngut ki dkhot ba la shah siat”, la ong ka jingthoh na ka sorkar halor ka jingkylli ia ki dkhot ka seng kiba shah siat ha ki bor ka ain naduh u snem 2000 haduh mynta.
Ka tnad kam pohiing ka la ong ruh ba kam don satia ka jingtip ia ka jingshah kem jong ki nongiarap ka HNLC. Ha ka jingshisha, na ka liang, u Rupang u la pan jingtip katno ngut ki nongiarap ka HNLC kiba shah kem naduh u snem 2000 haduh kine ki sngi. “Ka tnad kam ioh ia ka jingtip halor kane”, la ong ka jingthoh na ka tnad kam pohiing ka jylla ha ka jingwan jingtip da ka RTI.
Ka sorkar ka la pyni ba ia ki dkhot ka seng kiba la wan pyndem, la ai baibam T. 2 hajar shi bnai ha ka por ba ki dang don ha ka jingshah hikai ban thaw thymmai ia ka jingim.
Hadien ba ki la pyndep ia ka jingshah hikai ha ka Rehabilitation Camp ba la buh da ka sorkar, ki dkhot kin sa ioh ia ka jingiarap pisa kaba T. 1.5 lak (shi lak san phew hajar) khnang ba kin lah ban seng ia ki kam ki jam jongki, ban kyrshan ia ka iing ka sem ha ka jingim jongki. Ia kane ka jingiarap la bei da ka sorkar pdeng hapoh ka Security Related Exependiture Scheme.
“Ki dkhot kiba la pyndep lai bnai ha ka jingshah hikai khlem kano kano ka jingshah ujor ne leh bakla, ki lah ban ioh ia kane ka skhim jingiarap, kaban pynlait lai sien”, la ong ka jingthoh na ka sorkar.
Hynrei kito ki dkhot kiba lah ban ioh kam noh ha ki tnad sorkar, kin nym ioh shuh ia kane ka jingiarap.
Ka la ong ruh, ba kito ki dkhot kiba donkti ha ki kam runar barit baria, kin pynlait noh katba ia kito kiba don kti ha ki kam runar ba kham shyrkhei kum ka jingpyniap briew, leh beijot, rahbor, kin hap ban bishar shwa ka lynti ka ain.