23 Risaw, yn pynkhynniuh ka Megadeth ia ka sor Shillong

Shillong, 13 Nailar:
Ki la don bunbah ki kynhun Tem ba paw ka pyrthei kiba la wan ban iuh kjat ha nongbah Shil long, ka nongbah kaba la tip kum ka nongbah jong ka rwai ka siaw. Nyng kong eh ki kynhun tem ba paw ha ka pyrthei kiba la wan ban pynkhynniuh ia ka nongbah Shillong ka dei ka kynhun jong ka Petra, hadien bud sa ka Micheal Learn To Rock, nangta sa u Eric Martin, Iron Maiden, ka Scorpion, White Lion, Fire House, Hoobantank, ka Dyieng Fetus, bad ha ka 23 tarik u Risaw, 2015 pat yn wan ban pynkhynniuh ia kane ka nongbah da ka kynhun tem jong ka Megadeth.
Ka Megadeth ka dei ka kynhun Tem Metal na Amerika, kaba la thaw da u nongtem Guitar uba tbit ha ka pyrthei u Dave Mustaine hadien ba u la phet noh na ka kynhun tem ka Metallica. Ka dei ka kynhun ka don 4 ngut ki nongtem jong ka bad nalor u Mustaine ki lai ngut kiwei pat ki dei u Dave Ellefson u nongtem Bass, Grag Handevidt u nongtem Guitar bad u Dijjon Carruthers u nongtem Drum.
Ia katei ka kynhun Tem ka Megadeth la sdang bad la thaw da kitei ki 4 ngut ki nongtem kiba la paw ha ka pyrthei, hynrei katba nang iaid ki sngi ki don ki dkhot jong ka kiba la mih noh na katei ka kynhun kaba la poi ruh u pud ba ka la jan duh jan dam syndon noh, hynrei u Dave Mustaine bad u Ellefson ki la rai kut ba lada ka long kumno kumno ruh kin pynim biang ia ka kynhun jong ka Megadeth bad ha u 2015 ki la rai ban shu shim wai ia u nongtem Guitar napoh Brazil u Kiko Loureiro ban ia tem lang ha katei ka kynhun jong ki.
Ki jingrwai kiba paw bha ba la rwai da katei ka kynhun ki long kum ka Washington is Next, ka Skull Beneath the Skin, ka Wake Up Dead, Foreclosure of a Dream, ka Hanger 18 bad kiwei pat kiba ki nongieit sur jingrwai Metal ki sngewtynnad ban sngap. Ha ka 23 tarik u risaw katei ka kynhun Tem kan tem ruh ia ki jingrwai ba kham paw jong ka ha nongbah Shillong.