22tarik, yn leit jngoh ka KHADC ia ka kper rep dawai ha Lum Sohpetbneng

 Shillong: Ka Khasi Hills Autonomous District Council shen kan sa leit jngoh ia ka kper rep dawai kynbat jong ka Council kaba don hajrong u Lum Sohpetbneng bad ha ka juh ka por ban leit jngoh ruh ia ka shlem ai jinghikai ia kiba kwah ban sumar da ki dawai kynbat. U Executive Member ka KHADC, u Bah Titostarwell Chyne, ha ka jingiakren bad ki lad pathai khubor, hadien ba la wai ka jingialang jong ka Khasi Traditional Medicine Commission jong ka KHADC, u la iathuh ba ka jingthaw ia kane ka Commission ka long ban kyrshan bad ban iarap ia ki nongsumar dawai kynbat jong ka Ri Lum Khasi bad khnang ban pynsngewthuh ruh ia ki paidbah nongshong shong ia ka jingkordor jong ki khlaw ki btap kiba dap da ki dawai kynbat kiba long ki jingmyntoi na ka bynta ka jingim briew.