22 haduh 30 tarik jylliew, ka korphiw miet ha East Khasi Hills

Shillong: Kum shi bynta ban teh lakam ia ka jing pur ka jing pang ‘corona virus’ hapoh ka jylla, khamtam hapoh ka East Khasi Hills, na ka liang ka ophis treikam ka Deputy Commissioner (DC), East Khasi Hills, ka la pynbna ban pynjari biang ia ka korphiw miet naduh 22 tarik jylliew haduh 30 tarik jylliew 2020 naduh ka por 9 baje mynmiet haduh 5 baje mynstep hapoh ka East Khasi Hills.

Ka ophis treikam ka DC, ka la shim ia kane ka rai kum shi bynta ban pyntreikam iaki kyndon ka tnat ka koit ka khiah ka jylla kum shi bynta ban iakhun pyrshah ka jing pang ‘corona virus’ da ka ba khanglad ia ka jing ialum paidbah, khamtam hapoh ka nongbah Shillong.

Ka hukum na ophis treikam DC la batai ba ka korphiw miet kan nym treikam ia ki nongtrei sorkar, ki pulit bad shipai, ki nongtrei ka tnat ka koit ka khiah, ki dukan die dawai, ki dukan die marbam, ki nongtrei ka tnat MeECL, NEEPCO, Power Grid, FCI, PWD, PHE bad ka Shillong Municipal Board, ki nong leit sam bam, ki petrol pump, ki nongtrei ka sorkar bad ki nongthoh khubor.

Ka hukum ka kyntu ia baroh bad bud ryntih ia ki kyndon ka tnat ka koit ka khiah ka jylla haba dei bad ka jing ia jngai na kiwei pat.
Nalor ka korphiw miet; ka hukum na ka ophis treikam DC ka East Khasi Hills, ka pynshai ruh ba la khang iaka jing ia rung ia mih briew na kiwei ki jylla sha kiwei pat lait noh tang iaki nongtrei kiba la pyntbit ialade lane ki ki ‘skilled’ bad ‘Highly Skilled Workers’ kiba la ioh jingbit na ki bor sorkar bad ki dukan kiba plie kin dei tang katto katne kiba la ithuh ka sorkar bad kidei ban plie tang haki por bala pynbeit ka bor district. La kyntu ruh ia ki paidbah ban kiar na ka jing ialum paidbah bad ban bud ryntih iaki kyndon ka tnat ka koit ka khiah haba dei bad ka jing tehlakam iaka jing pur ka jing pang ‘corona virus’ hapoh ka jylla.
Haba dei bad ka jing iaid kali, ka hukum na ophis DC la batai ba ki kali naduh ki kali riew shimet haduh ki kali paidbah ki dei ban iaid katkum ki kyndon bala pyllait dang shen.
Ka hukum ka la batai ruh ba ia ki swimming pool, ki jaka lehkai lane ki ‘Gaming Station’ bad kiwei ki jaka ba khring paidbah ym pat shah ban plie katba ki ‘restaurant’ ki lah ban plie, hynrei ki dei tang ban shu rah sha ing.
Ia kane ka hukum la pynmih kum shi bynta ban buh ki kyndon naka bynta ban tehlakam iaka jing pur ka jing pang ‘corona virus’ hapoh ka jylla.