21tarik yn leit shong kyrain ka HYC, ha iing u Mukul

rThang ia ka Ordinance ka sorkar ha Motphran
Shillong,16 Nailar:
Ka jingialang pyn shai Ordinance ka HYC kaba la long ha ka sngi thohdieng jong ka taiew ba la dep ha jaka iengtaksi ha ha Jaiaw, kaba don ha Motphran ka la pynbna ba ha ka 21 tarik mynta u bnai kan leit ban shong kyrain ha khmat ing u myntri Rangbah ka jylla u Dr. Mukul Sangma. Ia katei ka rai la pynbna da u President Rangbah katei ka seng u bah Peter J Lawai, u la pynbna ba katei ka jingshong kyrain kan sdang naduh ka por 1 baje mynsngi haduh ka por 5 baje janmiet.
Katei ka jingpynbna ka HYC ban leit shong kyrain ha khmat ing u Dr.Mukul, ka dei ka jingiakhih jong ka ban pynbor ia ka sorkar ba ka dei ban pynduh pyndam noh ia ka Ordinance 2015. Katei ka seng ka la byrngem ruh ba lada jia ba ka sorkar kam sngap, hadien katei ka ingshong kyrain ha ka 21 tarik kan pynbna sa da kiwei pat ki lynti ia khih.
Ka jingialang ka HYC kaba la long ha Motphran ka la sdang naduh ka por 1 baje mynsngi haduh ka por baje noh sngi. Ha katei ka jingialang kaba la pyniaid da u samla R. Synrem na Shella Circle, la mait phang da ki jingkren na u bah Nickson Dohling , Organising Secretary , hadien la pynbud sa u bah Lamphrang Kharbani President HANM, nangta sa u bah Robert June Kharjahrin General Secretary bad la pynkut pat da u bah Peter J Lawai, U bah Adelbert Nongrum, MDC ka Jaiaw uba dei ruh u CEM barim ka KHADC u la don ryngkat ha katei ka jingialang hynrei um shym la ai jingkren eiei ruh. Shuwa ban pynwai artad ia ka jingialang ki nongialam ka HYC ki la pyni ia ka dak ba ki pyrshah jur ia ka Ordinance da kaba thang ia ki jingthoh jong katei ka ain sorkar hangtei ha Stand Jaiaw.
Lah ban kdew ruh ba haba ai jingkren ha katei ka jingialang ki nongialam ka HYC ki la ai kyrteng ia ka Ordinance ka sorkar kum u Seinpuh ia ka Jaitbynriew, katba u bah Nickson Dohling pat u la ong ba ka dei kum u len lum u ban nguid tylli ia ka jaitbynriew namarba ka la ailad shaba palat ia kiwei pat ki briew na ri thor bad ki mynder ba kin ioh long trai shnong da kaba suk bad wat ban kit ia ka kam Rangbah Shnong. U bah Nickson u la pynkynmaw ba ha ka por ba ka HYC ka la leit ban ia kren bad u myntri ka kam ain ka jylla u bah Rowell Lyngdoh ban dawa pynduh noh ia katei ka Ordinance u bah Rowell u la ong ba hap ban rah ia ka sha ing dorbar thaw-ain ka jylla, “Lada ia ka kam nonghikai kam don jingeh ban tah sia lieh kan eh aiu ban tar ia ka Ordinance” ong u bah Nickson Dohling. Shuh shuh u la ong ba ia ka ain ruh la thaw hi da u briew bad haba u briew u thaw ne u shna ia kano kano ka tiar ka shim por ia u ban pyndep ia ka katba kan shim por pat tang da ki minit ban pynpra bad ban pynjot ia ka. Kumta u la ong ba lada ka sorkar ka mon kan ym don jingeh ba kan pyndam ia katei ka ain.