21 tylli ki bill sop bthuh ka KHADC

Shillong, 5 Lber:  
Ka sorkar jylla ka la pynthikna ba kan leh sted ban pyniaid wut wut ia ki 21 tylli ki Bill ka KHADC kiba shu sop bthuh la bun snem ka phail ka sorkar jylla kynthup ia ka Khasi Hills District (Village Ad ministration) Bill, 2014 kaba dang shu pdiang dang shen da ka Khasi Hills Autonomous District Council (KHADC).
Ia kane ka jing pynthikna, la pynsngew da u Myntri Rangbah ha ka jingiakynduh jong ka kynhun ba la ialam da u CEM ka KHADC u Bah Adelbert Nongrum bad u Dr Mukul Sangma hynne ka sngi. 
“U Myntri Rangbah bad ka tnad District Council Affairs ka la pynthikna ia ngi ba ki Bill kiba sahteng yn pyndep noh kham kloi,” la ong u Bah Nongrum hadien ba la iakynduh ia u Myntri Rangbah.
U la iathuh ba baroh ki don 21 tylli ki Bill ka KHADC kiba sah la bun snem naduh u snem 1994.
Kine ki 21 tylli ki bill ki dei kiba la shah pynphai ha ka DCA sha ka KHADC.
“Ngi la mynjur ba kan don ka jingiatreilang hapdeng ka Council bad ka sorkar jylla”, la ong u CEM.
Ha kawei ka liang u Myntri Rangbah u la ong ba ka tnad DCA ka la pynphai ia ki Bill namar ba ka donkam ban phah pynbeit ia ki jingduna bad ki jingtam.
 Hynrei kaba sngew phylla ka long ba u myntri ka tnad DCA u Bah HDR Lyngdoh uba dei u MDC bad MLA ka Congress u khlem don lang ha kane ka jingiakynduh.
 ”Ngim tip balei um wan u Bah HDR Lyngdoh hynrei ka dei ka kamram jong u Myntri Rangbah ban leh ia kaba donkam”, la ong u CEM.
U CEM ka KHADC u la ong ba ka jingiakynduh ia u Myntri Rangbah, kam dei namar ka jingtynruh ka liangpyrshah ka People’s Democratic Forum (PDF).
 ”Ha ka jingshisha ngi la pan sngi ban iakynduh ia u Myntri Rangbah la kham slem hynrei um pat lait bad mynta u la pdiang ia ka jingpan sngi ban iakynduh ia u” la ong u CEM.
Ki Bill kiba sahteng ha ka sorkar ki long KHADC (Regulation and Registration of Marriage and Divorce) Bill, 2005,  United Khasi Jaintia Hills District  (Trading by Non Tribals) (Eight Amendment) Regulation Bill, 2011, KHADC (Nomination and Election of the Syiem, Deputy Syiem bad Electors of Nongstoin Syiemship) (Second Amendment) Bill, 2013, KHADC (Allotment, Occupation or Use or Setting Apart of Land) Bill, 2014 bad kiwei pat.