21 tarik Naiwieng, ka elekshon shiteng samoi ha Nongstoin

Shillong, 21 Risaw:
Ka tnad election ka India ka la pynbna ba ka elekshon shiteng samoi na ka bynta ka Nongstoin kan long ha ka 21 tarik Naiwieng 2015 bad ka jingniew ia ka vote kan long ha ka 24 tarik.
Ka elekshon ka la pynbna ba ka tarik ba khadduh ban thep kyrteng kan long ha ka 4 tarik Naiwieng bad ka jingbishar bniah ia ki kot ki sla kan long ha ka 5 tarik Naiwieng bad ban weng noh kan long ha ka 7 tarik Naiwieng.
Ka elekshon shi teng samoi ha Nong stoin hap ban pynlong hadien ba u MLA u Bah Hoping Stone Lyngdoh u la khlad noh dang shen hadien ba la long nongmih khmat ba slem tam ha kane ka jylla bad wat ha ka ri India.
Kumba ka long haduh mynta, ki seng sain pyrthei ha ka jylla ki la pynlong ia ka jingpynkhreh ban iakhun ha kane ka elekshon naduh ka UDP, HSPDP, Congress, KHNAM bad kiwei ki seng sain pyrthei.Kumba ju iatip paidbah, ka Nongstoin ka dei ka ktem jong ka HSPDP ha kaba u Bah Hoping u la bat ia kane ka konstitwensi kum u nongkhmih paidbah la slem bha.Da kane ka jingpynbna ia ka sngi thep vote, mynta ki seng sain pyrthei kin sa bun kam ban pynkhreh ia ka elekshon. Na ka liang ka NCP ka la pynpaw ba kan bha ia baroh ki seng sain pyrthei ban nym iakhun ha kane ka kynti ban ailad ia kiba haiing u Bah Hoping ban mihkhmat na kane ka jaka kum ka jingburom ia u Bah Hoping.
Hynrei na ka liang ka KHNAM, ka Congress bad UDP ki la don ha ka jingpynkhreh ban iakhun  beit ia ka elekshon bad kan shong ha u paidbah ban ai ia ka rai jongu iano u ibit ban jied.Watla  ka UDP kam pat kren eiei iano kan pynieng hynrei na ka liang ka Congress la iohi ba u MDC shu sieh u Bah Gabriel Wahlang u la pynpaw ba u don ka jingthmu ban iakhun ia ka elekshon lada ka party Congress ka ikop ia u ban ai tiket ha kane ka kynti.Katba ka HSPDP kam pat pynpaw iano kan pynieng ha kane ka kynti uban kit ia ka lyngkot hadien ba la khlad noh u Bah Hoping.