21 haduh 24 tarik ka jingiaseng Assembly ka Balang u Blei ha Mawlangsu

Nongstoiñ: Ka jingiaseng Assembly ka Balang u Blei u ba im Khasi Jaintia (Meghalaya & Manipur) kan long ha ka Balang Mawlangsu West Khasi Hills District ka ban sdang naduh ka janmiet jong ka 21 tarik mynta u bnai ha ka por 6:30 PM haduh ka sngi u Trai ka 24 tarik.
Katkum ka kyrwoh na u bah H.S Marwein, la ong ba ki nongkren ha katei ka jingiaseng nalor ki Evangelist bad Pastor jong ka Balang ha Ri lum Khasi bad Manipur yn wan ruh ka Mrs Romila Young bad kiwei de na Kalimpong Darjeeling.
Ka Mawlangsu ka don kumba 12 KM ei ei na ka surok NH 44 E Shillong -Nongstoiñ bad ka lad ban poi sha katei ka Balang ka long na ka shnong Umlieh (surok PWD Tyllang – Nongriat) bad ka surok ka long kaba bha lah ban poi kali haduh ka jaka long jingiaseng.
Kumta la khot sngewbha ia ki paralok Khristan bad ki bym pat long Khristan ban kin ia wan sha katei ka jingiaseng ban ioh mad ia ki jingkyrkhu ba kynja mynsiem bad kan don ruh ka jingduwai kyrpang na ka bynta kiba pang ba shitom.