20tarik, ka komiti u Chairman KHADC

Shillong, 10 Nailar:
Ka komiti kaba la khlieh da u Chairman ka KHADC u bah Mansturdy Nongrem kaba la tip kum ka Advisory Committee on Khasi Customary Law (ACKCL) jong ka Khasi Hills Autonomous District Council (KHADC) ka la khot jingialang ia ki Syiemship, Sirdarship bad Lyngdohship ha ka 20 tarik mynta u bnai, na ka bynta ban pynshai halor ka jingthmu ban pynkhlaiñ bad kumno ban thaw noh ia ki jong ki Aiñ ki ban pynkupbor ia ki Khlieh Nongsynshar Shnong.
Haba iakren bad u Bah Nongrem u la iathuh ba hadien ka jingiakynduh kaba nyngkong ha ka 22 tarik mynta u bnai ba la lah, kane ka komitii mynta ka la shim ia ka rai ban khot jingialang noh ia ki Syiemship, Sirdarship bad Lyngdohship na ka bynta ban ioh pynshai halor katei ka jingthmu.
U Bah Nongrem u la ong ba ha katei ka sngi ka jingialang ka ban long ha ka por 11 baje, yn pynlong shwa hapdeng ki dkhot ka Committee bad ka Sirdarship bad Lyngdohship bad ha ka por 2 baje mynsngi pat yn sa pynlong bad ki Syiemship ban pynsngewthuh ban thaw noh ia la ka jong ka Aiñ ka ban pynkupbor kyrpang ia ki Khlieh Nongsynshar Shnong.