2,028 tylli ki kam pulit kiba lait, ong u myntri kam poh iing

Shillong: U Myntri u ba dei peit ia ka tnad kampoh iing ka jylla, u bah Lahkmen Rymbui haba jubab ia ka jingkylli, ba la wan rah da u bah Process T Sawkmie, ha kaba ia dei bad ki kam kiba lait hapoh ka tnad pulit u la iathuh ba baroh ki kam kiba lait ki long 2028 tylli.

U myntri u la iathuh hapoh ka ing dorbar ba kine ki kam ki long naduh ki Grade IV, haduh ki kyrdan kiba ha khliehduh. U la iathuh ruh ba ki don haduh 17 tylli ki kam kiba lait ha ka kyrdan MPS bad ia kine la khot aplikeshon da ka MPSC.

U Bah Rymbui u la iathuh ruh ba haba ia dei bad ki kam pulit kiba la dep khot da ka Meghalaya Central Recruitment Board (MCRB) la hap ban pynsangeh shuwa na ka daw jong ka jingwan ka khlam COVID-19.

U la iathuh ruh ba ka sorkar ka la ai jingbit mynta ban pynlong ia ka jingiamareh na ka bynta kito ki kam pulit kiba ka sorkar ka la dep ban khot aplikeshon kiba khlem lah ban pynlong ha ki por ba labuh na ka daw jong ka khlam COVID.

U la iathuh ruh ba ki kam kiba la dep ban pynbna mynshuwa ki long 1015 tylli ha ki bynta bapher bapher, ka tnad pulit kan sa pynlong ia kane ka jingmareh shen ha kine ki khyndait por ban sa wan. Haba jubab ia ka jingkylli bynrap jong ka Dr Amapreen Lyngdoh MLA, u myntri kam poh iing u la ong ba ka don ka bhah 10% ba la mang kyrpang ia ki kynthei hapoh ka tnad pulit bad lada don kiba lah kham bha ruh kam don jingpher.