2018, dei ka pali jingkylla ha ka sorkar, ong u Dr Jemino

Shillong 07 Nailur:
U General secretary ka UDP u Dr Jemino Mawthoh u la ong ba ka snem 2018 kan dei ka pali jong ka jingkylla ha ka sorkar bad kane ka pali kan dei jong ka UDP. “Ha ka jingsngew jong nga na ka sur jong u paidbah, ka snem 2018 kan dei ka pali jong ngi”, la ong u Dr Mawthoh haba iakren ha kane ka sngi Balang.
U Dr Mawthoh u la kren ruh ia ka jingdonkam ban don ka jingiatylli ka jingiatreilang jong baroh ki seng sain pyrthei bym dei Congress ban wanrah ia ka jingjop ha kane ka elekshon ban wan.
“Ngi donkam ia ka kynhun kaba khlain, bad ka UDP kum ka party kaba heh duh ha ka jylla ka long kaba jynsur mynsiem ban khot lang ia baroh kiwei ki party ban iatreilang”, la ong u Dr Mawthoh.
U la ong ba kiwei ki party kum ka KHNAM, HSPDP bad kiwei kim dei ban khim jingmut than hynrei ki dei ban pyrkhat ia ka jingdawa bad ka sur jong u paidbah uba kwah iaka jingkylla.
“Haba iaid sharumg shaneng, ki paidbah ki kwah ia ka jingiatylli, ngi long kiba jynsur mynsiem namar ba ngi pyrkhat na ka bynta kaba shakhmat hynrei lada ngin iapra shaei kan ialam.
U la ong ba ka jylla Meghalaya kaba rit kam don jingeh ban wanrah ia ka jingroi sted ym kum kiwei ki jylla bah eh. “Ngi donkam ban wanrah ia ka jingkylla ha ka synshar bad ruh ha ka khadar khnang ban pynkylla dur ia ka jylla”, la bynrap u nongialam ka UDP.
U la ong ba ban pynurlong ia kane ka jingiatylli, ka UDP ka la dep thung ia ka Special Committee ban iathir iathain halor kane ka bynta bad kiwei ki seng sain pyrthei.
Ha kawei ka liang, ka jingiatylli bad ka jingiatreilang ki seng sain pyrthei ha kane ka jylla ka lah ban buh jingeh namar ba kumba ka long mynta ka KHNAM bad ka HSPDP ki leh jngai ban don ka jingiatylli bad ki la dep pynbna ruh ia ki jong ki kyrtong na ka bynta ka elekshon.