2000 trok ha ka shi samoi, la shalan synsar na jylla Meghalaya

Shillong:Ka jingpynmih synsar ka jylla Meghalaya ha ka shi snem ka long kaba jur bha bad ia u synsar la shalan shabar jylla kylleng ka ri India.

Ha ka jingia kren bad uwei u kharkaia ba ju thied synsar bad kiwei ki mar rep kum u sohmrit ha kane ka jylla, u la iathuh ba ha ka shi snem, ym duna ia ka 2000 trok heh la ju shalan ia u synsar na jylla Meghalaya sha ki jylla ba heh ka ri India kum sha Maharashtra, Delhi, Rajasthan, Kolkata bad kiwei ki jylla.

“Shi samoi te, kumta hi 2000 trok eiei la shalan ia u synsar nangne na Meghalaya”, la ong u mahajon ba shong ha thain Anjali haba iakren bad u nongthoh khubor.
Ha kajuh ka por, u la ong ba ka dor ka hiar ha kine ki sngi namar ba bun u mar (synsar) bad kane ka dei ka rukom ha ka iew ka hat. “Haba bun u mar, ka jingdawa ka duna bad haba duna ka jingdawa, ka dor ruh ka hiar hynrei lada duna u mar, ka dor ka heh”, la ong une u kharkaia.

Ka dor jong u synsar ha kane ka snem 2023 ka hiar bha haba ianujor bad ki snem ba la leit bad katkum ka jingtip na ka iew dielang ha Mawiong, la iathuh ba ka dor ha une u bnai ka la kot tang 101, 102, ne 103 tyngka shi kilo.
Mynshem snem la iathuh ba ka dor jong u synshar ka la kot sha ka 130-150 tyngka ruh shi kilo hynrei ha kane ka snem ka la hiar kynsan bad katkum ka jingiathuh jong ki briew kiba don ha katei ka iew, ka lah ban dei na ka jingdon ka elekshon. La iathuh ba man ka por ba ju don ka elekshon, ka dor ka hiar namar ba kiba bei pisa ki hap ban khyllie biang.

Ha ka shi sngi, kumba 30-40 tylli ki kali Pik Up kila wanrah synsar ban die ha kane ka iew hynrei mynta ka la kham duna namar ba ka hiar ka dor. Ia u synsar la shalan kylleng ki jylla ka ri India.
Ha katei ka iew dielang (MeCOFED) ki don kumba 13 ngut ki kharkaia kiba pyniaid bad thied synsar, thied sla tyrpad, sohmrit bad kiwei ki mar rep bad na katei ka iew, la shalan shabar jylla. Da ki phew kali kiba wanrah ban die ia u synsar la pynpo sha kane ka jaka kynthup na thain war, thain West Khasi Hills, na Jaintia Hills, na Bhoi ruh kumjuh.
Ia u synsar la song bha ha ka byrni hadien ba la dep thew bad la pyniakhlad katkum ka jingling ne jingbha kaba mut u number One ne shi numbor, ar numbor bad kumta ter bad ia ka dor ruh la pynshong katkum ka jingbha bad ka jingsniew.