200 ngut tam, wan pynïasoh ki nongïalam, na kiwei ki seng sha ka UDP ha Mairang

Mairang: Kum ka jingsdang ban pyni ïa ka kam ha ka jingwanrah ïa ka jingïatylli, u president rangbah ka United Democratic Party u bah Metbah Lyngdoh uba long ruh u MLA ka Mairang hynne ka sngi u la sdang shuwa na la ïing ban lum ïa baroh ki nongkitkam bad ki nongkyrshan bad ha kajuh ka por ban pdiang ïa ka jingwan pynïasoh jong ki nongïalam kiba na kiwei ki seng saiñ pyrthei kynthup kiba na ka Congress.

Ha kane ka sngi kiba lawan ban pynïasoh sha ka UDP kiba kynthup ïa ki nongïalam kum u bah S. Mawlong uba ladon ha ka Congress kumba 30 snem, u bah Lambor Nongrang, SL Marshillong u nongkyrshan ka seng HSPDP bad kiwei kiwei ki riew rangbah, ki longkmie, ki samla kiba la kot haduh kumba arspah ngut ha ka jingïalang kaba la pynlong ha ka ophis treikam jong ka UDP Mairang kaba ha Lumsohkhlur.

Haba ai jingkren ha katei ka sngi, na ka liang u bah Metbah Lyngdoh u la ong, kum u nongmihkhmat ka thaiñ bad u nongialam jong ka seng UDP, nga pdiang ïaphi ym kum ki riew thymmai hynrei ban shim ba phi long kiba ïa katjuh bad ki nongkitkam ki nongkyrshan kiba ladep ban don lypa bad ka UDP.

Ha kajuh ka por, u la kyntu ïa ki nongkitkam kiba mynta ba kin pdiang ïa kane ka sngi kum ka jingwanrah ïa ka jingïatylli hadpeng ki paidbah ka konstitwensi bad ba ki nongkitkam ka party naduh nangne shakhmat kidei ban pynjan bad pynlong ïa ki dkhot kiba rung thymmai ba kim dei ban pyni ïa ka jingsngew jngai hynrei ban pynjuh bad ban pynjan.

U la kyrpad ïa ki nongkitkam ka UDP, ba kane ka rukom treikam kadei ban long lang naduh ka circle haduh ki unit bad u la pynsngew ruh, ba lada ki dkhot kiba rung thymmai ki sngew ba ka don kano kano ka jingshah leh shiliang kidei ban pyntip sha nga.

U bah Metbah u la ban ruh halor ki kam pynroi bad ong, kumba ka long, ki kam pynroi hapoh kane ka konstitwensi kin dang bteng na ka bynta ka jingmyntoi jong u paidbah.

U General Secretary ka UDP u bah Jemino Mawthoh uba ladon ryngkat ha katei ka sngi, u la ong, tang ki nongïalam yn nym lah ban trei hynrei donkam ïa ka jingïatreilang na baroh ki liang kynthup ïa ki paidbah ba kin don ka mynsiem ïatylli.

U la ong, kane ka jinglah jong u MLA uba long ruh u President ka party UDP ka pyni ba kadei ka jingsdang kumno ban pynpaw sha ka pyrthei ba ka UDP ka kloi ban trei na ka bynta u paidbah bad khamtam eh ban shakri ïa ki jingeh kiba u paidbah u ïakynduh na ka por sha ka por.

U bah Lambor Nongrang uba long ruh u rangbah uba la ju ïakhun ïa ka ilekshon na Mairang u la ong, “Nga bad ki paralok, nga wan sha ka UDP na ka jingïohi ïa ka jinglong jong u nongïalam bad uba lah ban pyntyllun ïa ki kam naduh ka circle bad haduh ki unit.”

U la ong ruh ba u angnud ba hapoh ka jingïalam u bah Metbah, ka UDP kan dang khlaiñ ruh ha baroh kawei ka Jylla.

Shuh shuh u la pynsgew ba kum u riew shimet, u wan sha ka UDP mynta kadei na ka jingbishar ïa ki kam kiba khraw ba u MLA ka thaiñ u la leh na ka bynta ka konstitwensi bad ki paidbah.

Kiwei pat kiba la ai jingkren ki kynthup ïa u bah S. Mawlong uba long u nongïalam ka Congress haduh 30 snem, u bah S.L Marshillong, bah T Mawlong bad kiwei kiwei.

Ki nongïalam pawkhmat ka UDP kiba ladon lang ki kynthup ïa u MLA ka Ranikor, bah Pius Marweiñ, bah Allantry Dkhar Vice President bad ki nongkitkam ka Mairang.

Ha kajuh ka sngi la pynskhem ruh ïa ki nongkitkam bathymmai jong ka Mairang UDP Circle kiba kynthup ïa u bah S. Roy Ryntathiang kum u President, bah Metbah Lyngdoh kum u Working President, bah SS Syiemlieh kum u vice president, bah Tairos Warjri kum u General Secretary, u bah Pyndap Nongsiej kum u treasurer, u bah E. Nongrang kum u organiser secretary, adviser bah P.S Lyngdoh bad ki EC member la pynskhem ia ki president jong ki shiphew tylli ki Zone kiba hap hapoh ka Mairang konstitwensi.