Shillong, 16’lyngkot:
Ha ka 31 tarik u Lber, 2015 ka KHADC ka la khot aplikeshon na ka bynta ban pyndap ia ka kam Magistrate, Subordinate District Council Court, KHADC, Shillong bad la buh tarik ba ia ki aplikeshon, dei ban pynpoi hapoh ka 15 tarik u iaiong, 2015. La buh kyndon ruh ba kiba lah ban aplai dei tang kiba la don kyrdan Degree na kano kano ka University kaba la ithuh bad ka snem ka dei ban long hapoh 30 hynrei yn kham pynjynsur ia ki riewlum ST/SC 5 snem kaba mut haduh 35 snem.
Ia kiba don lypa ha ka kam la buh ba yn pdiang tang haduh 48 snem karta kata ruh ki hap ban pynshisha ba ha ka por ba ki rung kam ki rung ha ka rta kaba biang. La buh kyndon biang ba ki nongiakhun ia katei ka kam ki dei ban long kiba la shem phang bad kiba mad ia katei ka kam 5 snem kum ki nongiasaid aiñ. Ha ka 15 tarik u iaiong, 2015 ka sngi ba ki pynkut ban pdiang aplikeshon la pynmih jingpynbna biang ba la pynjlan ia ka tarik thep phom sha ka 10 tarik u jymmang, 2015 bad ia ka rta la pynbna sad a kumwei pat kata ba na ka bynta ka rta ia ki ST/Sc kan long noh haduh 40 snem karta kata haduh ka 1 tarik u kyllalyngkot, 2015. Ki la don haduh 46 ngut ki kyrtong kiba la ia khun ia katei ka kam bad ha ka 21 tarik u nailar, 2015 la pynbna ba ka tarik ban ia khun ia ka written test kan long ha ka 5 tarik u nailur, 2015 ha BBS College bad na bynta ka written test ka full mark ka dei 200 kata 100 ia ka English, General Knowledge bad Legal Reasoning katba sa 100 pat ka dei ia ka Law, Major Acts, Family Law, Customary Law, Human Rights, Administration of Justice bad ka Sixth Schedule under Constitution.
Ha katei ka written test haduh 15 ngut ki kyrtong ki khlem wan thoh ia ka eksamin. Katkum ka jubab RTI kiba la wan ban thoh eksamin bad kiba ioh 100 shaneng ki don 7 ngut kaba heh tam ka mark dei ka kong Laikynti Kharshiing, 30 snem karta kaba la ioh 120 mark bud sa ka kong Melvereen Iangrai, 45 snem karta kaba la ioh 118 mark, nangta sa ka kong Natalie Ione Dkhar, 34 snem karta baroh 3 ngut ki dei kiba la pass na Shillong Law College.
Napdeng ki 31 ngut kiba la wan ia khun (15 ngut kiwei pat ki absent) ki don 13 ngut kiba la pass bad ha ka 6 tarik u risaw, 2016 (kaba mut hadien shisnem tam ba ai khun ia ka written test) la pynmih jingpynbna lyngba ka shithi sha kitei ki 13 ngut ba ka personal interview kan long ha ka 13 tarik u risaw, 2016 ha ka por 12 baje shiteng sngi ha Conference Room ka KHADC, Shillong. Na bynta katei ka interview la thung 5 ngut ki nongpeit bad nongbishar iano ban thep ha katei ka kam bad kitei ki 5 ngut ki long u bah S.Kharsyiemlieh (Judge District Council Court) kum u chairman , Prof.L.S Gassah ( Dept. Political Science, NEHU), u bah Toki Blah ( Retd IAS), bah R.S Wanniang ( Joint Secretary KHADC) bad u bah D.G Syiemiong ( joint Secretary KHADC). Katkum ka jubab RTI ka pyni ba ha ka personal interview kaba don ia ka full mark kaba 500 ka kong Larikynti Kharshiing kaba heh duh ki mark ha ka written test kam shym la wan (absent), ka kong Melvereen Iangrai kaba heh mark ba-ar ha ka written test kaba la ioh 118 ha ka personal interview ka ioh tang 182 mark na ka 500 mark, ka kong Natalie Ione Dkhar ruh kam wan. Uba ioh hehduh ka mark ha ka personal interview napdeng ki 13 ngut dei u Marcus Shangpliang uba la ioh 293 mark na ka 500 mark katba ha ka written test pat u ioh tang 100 mark. Nangta ka kong Ibaphidahun Shisha L Mawphlang ka la ioh 212 mark ha ka personal interview, katba ha ka written test pat ka ioh tang 94 mark, kong Jennyca F blah ka ioh 250 mark ha ka personal interview katba ha ka written test ka ioh tang 94 mark.
Bun kiba la kynthoh wat napdeng ki MDC ruh halor katei ka interview thungkam Majistor ha District Council Court bad la kynnoh ba ka jingpynbun ia ka full mark kaba haduh 500 mark ha ka personal interview ka dei ka jingmut ban kham ailad iano re iano bad kawei pat ka mat kaba ka KHADC ka la shah kynthoh ka dei halor ka jingpynjlan ia ka rta ki nongiakhun kaba nyngkong na ka 30 snem kaba la pynjynsur 5 snem ia ki ST/Sc la pynkylla pynban hadien sha ka 40 snem bad katei ruh la kynnoh ba ka dei ka jingthmu ban pynrung ia ki briew kiba ki la don jingmut dano re dano.
Halor katei ka bynta u Rupang u la ioh ban ia kren bad ka kong Rona Khymdeit MDC ka jong ka Nongpoh kaba dei ruh ha kajuh ka por ka nongiasaid aiñ, ka kong Rona ka la ong ba ha ka jingiaid lynti bad ka jingshem jong ka ha ki kam aiñ haduh mynta kam pat ju don ka jingai full mark ha ka personal interview kaba haduh 500, lada ia nujor ia ka written test kaba tang 200. Ka la ong ba kaei kaba ka ju lap ka dei beit haba don 5 ngut ki nongshim interview-la buh 10 mark ia uwei kaba mut ba lada ki don 5 ngut kan long 50 mark ka total mark.
Phi don ban ong eiei?