Shillong, 20 Naiwieng:
Ka KSU Pynursla ha ryngkat ka jingsynran lang ki nongialam ka KSU Sengkmie mynta ka sngi, ki la leit ia kynduh ia u Deputy Commissioner ka East Khasi Hills bad ki la buh ia ka jingujor hakhmat u DC namar ka jingwan tuh maw ki khar Bangladesh kaba manla ka sngi na Wah Khasmar kaba hap ha Nongsohphan-Raid Lyting bad ha Elaka Nongshken.
Katkum ka jingiathuh u President jong ka KSU Pynursla u samla Ennocent Khongstia u la ong ba katei ka jingtuh maw ki khar Bangladesh ka dei kaba manla ka sngi bad ki ju wan da ki lieng ne da ki kali. U la iathuh ba ki khar Bangladesh, ki ju wan tuh maw na bri jong ki riew shimet bad ki tuh bad pynjulor ruh ia ki diengkwai bad kiwei pat ki jingthung jingtep.
U samla Khongstia u la iathuh ba ki Khar Bangladesh ki la sdang ia katei ka jingwan tuh maw naduh u snem 2007 hynrei hadien katto katne por ba ka KSU ka la shim khia ia katei ka bynta ki la sangeh noh bad dei ha u snem 2015 haduh mynta ba katei ka jingtuh maw ka la sdang biang. U la ong ba la ujor nyngkong eh ha u snem 2007 ia katei ka jingwan tuh maw ki khar Bangla da ka kong Victoria Rymmai hynrei mynta ruh katei ka trai bri ka la wan ujor biang sha ka KSU bad u la ong ba don ruh kiwei pat ki trai bri kiba la sha ktah hynrei tang katei ka longkmie kaba la wan ujor.
Katkum ka jingiathuh utei u nongialam KSU u la ong ba bun ki bynta kiba shah ktah eh ha katei ka jingwan tuh maw ki khar Bangla kiba ju wan ha ka por mynsngi ruh ka dei ka jaka kaba hap sha Nongsohphan bad katto katne ha ki bynta ba hap ha Nongshken ( ki jaka ba don mar shilliang bad katei ka wah Kashmar). Katei ka jaka ka don ruh ha syndah jong u Pillar 1263-9S. La kylli kumba katno trok ki khar Bangla ki ju kit maw na kitei ki jaka , utei u nongialam KSU u la ong ba kumba 20 trok ha ka shisngi. Utei u nongialam KSU u la ong ba hadien katei ka jingiakynduh u DC u la ong ia ki ba un sa khot jingialang ia ki shipai BSF bad ia u SP ka East Khasi Hills ban ia kren ia katei ka bynta bad hadien ka jingialang un sa pyntip sha ki nongialam jong katei ka seng.