20 tarik, ki nonghikai sha Secretariat

Shillong, 12 Nohprah:
Ka jingialang jong ka All Meghalaya SSA School Teachers Association (AMSSASTA) ka la long mynta ka sngi ha Communitty Hall , Mission Compound Shillong bad ha katei ka jingialang ki nonghikai SSA ki la rai ban leit shong kyraiñ hakhmat Secretariat naduh ka 20 tarik mynta u bnai naduh ka por 11 baje mynstep haduh ka por 4 baje nohphai sngi bad katei ka jingiakhih jong ki kan iai bteng tad haduh ba kin da ioh jubab na ka sorkar halor ka jingdawa jong ki. Ka jingiakhih jong ki ka long ban pynpaw ia ka jingpyrshah halor ka jingsam shilliang ka sorkar ia ka tulop ki nonghikai SSA.
Ka rai jong ki ka long ban shong kyraiñ hakhmat Secretariat katkum katei ba ki la kdew hynrei haduh mynta la ong ba kim pat ioh jingbit na u Deputy Commissioner ka East Khasi Hills la un shah ne-em ia ki ha katei ka jaka bad ha katei ka por ba la kdew.