![](https://www.urupang.com/wp-content/uploads/2023/06/image-63.png)
Shillong:Ka jingpep skul shiteng por ka la wanrah ka jingsngew khia jur ia ka sorkar jylla bad tang ha ka klas X haduh XII, kumba 20 hajar ngut kiba pep noh ha u snem 2020-21.
Haba kren mynta ka sngi, u Adviser ka tnad pule puthi ka jylla u bah Hima laya Shang pliang u la ong ba kat kum ka kaiphod ki don 20 hajar ngut eiei ki khyn nah kiba pep skul noh hapdeng ka klas X bad XII ha u snem 2020-21. U la ong ba ka jingpep skul ha ka jylla ka la kot sha ka 21 percent bad ka dei ka jingkhein kaba heh bha.
Ban tehlakam ia kane, u bah Himalaya, u la ong ba ka sorkar ka la phah ban pule bniah ia ki daw bad ban wanrah ia ki jingai jingmut kumno ban pynbeit ia kane ka jingeh.
“Ka jingpep skul shiteng ha secondary ka long 21 percent bad ban ioh ia ka daw, yn pule bniah ia ki daw ba ialam ban pep skul shiteng bad ban ai jingmut kumno ban ialeh ia kane ka jingpep skul ki khynnah”, la ong u bah Shangpliang.
Katkum ka jingiathuh u bah Shangpliang, ha 2020-21, ka jingpe skul ka la kiew 20 hajar ha klas X-XII bad kane ka lah ban dei na ka jingsah klas bym lait ha ki eksamin, ne bym lah ban leit pule sha kyrdan ba kham sha jrong, ne ka lah ban dei na ka jingduk nad kiwei ki daw. “Ngi la iohi ba klas I-2 ruh, ka don ka jingpep skul bad ka donkam ban pule ban wad ia ki daw”, la ong u bah Shangpliang.
Dang shen, ka sorkar jylla ka la shim ban pyntreikam ia ka New Education Policy (NEP) ban pynduna ia ka jingpep skul ki khynnah bad u myntri u la thaw ia ka Committee ban pynwandur biang ia ka Education Policy ka jylla ban pyniasyriem bad ka NEP.
“Yn kham pynleit jingmut ha ka jingpule thaw kam na klas VIII haduh klas XII, khnang ba kito bym kwah ban leit pule shajrong kim ym pep skul, bad kin lah ban ieng ha la kijong ki kjat”, la ong u bah Shangpliang.
Ha kajuh ka por u la ong ba kawei pat ka dei ka jingduna ki skul Higher Secondary ha ka jylla bad u la kyntu ia ki Managing Committee jong ki skul Secondary ba kin kyrpad ia ka sorkar ba kin plie ia ki Higher Scondary.
U Adviser ka tnad pule puthi u la kyntu ia ki nonghikai ba kin don ka jingkitkhlieh watla ki don shibun ki jingeh namar ba ka sorkar kam ym ieh ia ki, bad ula maham ba kim dei ban leh sting ia ki kam jongki, katba na bynta ki skul kiba duna nonghikai kan pynsted ban khot interbiw noh ia kiba pass ia ka MTET katba lah.
“Ka don ruh ka jingduna ki skul Higher secondary. Haduh mynta ki don 1452 tylli ki Secondary school, 386 tylli ki Higher Secondary, bad bun ki samla ki shem jingeh ban ioh rung klas namar ba duna ki skul”, u la ong bad bynrap. “Ka sorkar kan pynshlur ban plie bun ki Higher Secondary bad kyrpad ia ki Managing Committee ki Secondary ban kyrpad ia ka sorkar ban plie ia ki Higher Secondary”.
Ka don ruh ka jingduna ki nonghikai ha ki skul bad ki don ki nonghikai ba la pass ia ka MTET bad ka sorkar kan pynlong noh ia ka interbiw. U bah Shangpliang u la kyrpad ia ki nonghikai bym ioh tulop biang por, bym ioh jingsiew thikna, bym thungkam pura bad bym ioh baibam tymmen, ba kin shim khia namar ba ka sorkar kan peit ia kine ki jingeh jongki.
“La don ki kaiphod ba ki nonghikai kim leit hikai sha ki skul, ki lapmiet ha kiwei pat ki kam, ki shu ai bylla ha kiwei. Ki nonghikai ki dei ban don ka jingkitkhlieh ia ka lawei jong ki khynnah bad ka sorkar ka don ban peit ia ki”, u la ong.
Ki don ki skul bym lah ban leh bha ha ki eksamin ha ka SSLC, bad ka sorkar ka la shim khia ia kane. Ka sorkar kan ailad ia ki ban pynbha ialade bad ka sorkar kan sa bishar ia ka jingtrei jongki.
Phi don ban ong eiei?