Shillong: Namar ka jingwan poi jong ki briew ba na bar ka jylla, kiba hapoh jong ka dongshatei Lammihngi, kiba la sdang ban poi naduh myn hynnin ka sngi ha ka jylla Meghalaya bad la shem ia ka jingkhapngiah ka jaka screening kaba don ha 12 mile bad ka la wan rah ruh ia ka jingeh shibun ia ki pulit nongpahara bad ki pulit ka tnad pulit traffic bad kumjuh ia ki nongtrei jong ka Covid-19 Center.
Kumta ban weng ia kine ki jingeh, na ka liang ki nongpyniaid kane ka jaka Screening mynta ka sngi ki la pynkynriah noh ia ka jaka screening na 12 mile sha ka jaka ba kham kylluid ha 13 mile Byrnihat Bylane Ribhoi District. Haduh mynta ka sngi palat 20 tylli ki bus jong ka Assam State Transport Co-operation, kiba la wankit ia ki briew ki ba pule bad trei ha ki jylla ba pher bapher jong ki dong shatei ban pynpoi ia ki sha sha la ki shnong ki thaw ba ki sah.
Na ka liang u MLA ka Jirang Constituency, u bah Sosthenes Sohtun mynta ka sngi u la leit hi da lade ban jurip ia ka ne ka jaka Screening kaba don ha 13 mile Byrnihat Ribhoi District, da ka ba u la shim khia ruh ban phah synreit dawai ia ki sawdong saw kun jong ka ne ka jaka. Na ka liang u MLA, u la buh ruh ka jing kyrpad ia ki paid bah nongshong shnong kane ka jylla ba kin iatrei lang ha kane ka jingialeh pyrshah ia ka khlam Covid-19.
U la buh ruh ka jing kyrpad ia ki nongshong shnong bad ki dorbar shnong ba kim dei ban niewbein ia kine kiba wan phai sha ka jylla bad ban pdiang ia ki kum ki nongshong shnong jong ki hi.U la kyntu ruh ia ki briew kiba la wan phai na ki wei ki jylla ba ki dei ban bud pyrkhing bha ia ki kyndon kiba la pynmih da ka tnad ka koit ka khiah.
U la ai khublei ruh ia ki bor pyniaid District, ki tnad ka koit ka khiah, ki tnad pulit ba naduh mynnin ka sngi hi, ki la trei shitom ban pynbiang ia kane ka jaka khnang ba ka jylla kan long ka ba shngain.
Phi don ban ong eiei?