Shillong: U CEM ba thymmai ka KHADC u bah H.S Shylla haba kren hapoh ing dorbar ka Khasi Hills Autonomous District Council (KHADC) u la pynkynmaw ba ha ka por ba u long CEM ha u snem 2004, u la pynkhuid ia ka jyrsieh bamsap kaba shyrkhei tam hapoh District Council bad katei ka dei ia ki kali jong ka District Council. U la ong ba ha katei ka por u lap ba ki kali ki ieng hajuh tang u briew napoh karkhana u ba kyrteng u Durga u wan pan bill napoh District Council ban iathuh ba u la dep shna ia ka kali, “Ka kali ka ieng hajuh, wan pan bill pynban, nga kylli mynno ki shna haba nga iohi ba ka ieng hajuh, u la iathuh ba la shu thaw bill naba ki MDC ki leit pan T.5000 ne T.10,000 tyngka na u bad la phah ot ia ka pisa da kaba shna bill” ong u bah Shylla. “Ha katei ka por nga la pynkhuid ia katei ka bamsap kaba shyrkhei bha, ki kali ba pyndonkam ki EM nga la ong ba kin shim noh ma ki bad yn ot khyndiat khyndiat na ka tulop jong ki bad ia kiwei pat kiba ieng hangthie nga la die lilam lut plain bad mynta kam mih shuh” u la ong.
U bah Shylla u la kynnoh ba u bah Pynshngaiñ N Syiem haba u shong ha ka shuki CEM u la pyndonkam bakla shaba palat liam ia ka bor jong u ha kiba bun ki bynta, ” U bah Pynshngaiñ u bam haduh 20% na uwei u kontraktor uba pyntrei ia ka jingtrei ba T.28 klur jong ka District Council, nga ioh jingtip ruh ba dang step u la leit ieng ha khyrdop jong u kontraktor ban pan sa T.52 lak tyngka ba u donkam kyrkieh, utei u kontraktor bapli haba la poi u briew ha khyrdop u hap ban sei ia ka pisa” ong u bah Shylla. “Ka jingbiej pisa kaba la shyrkhei haduh bym bit shuh ban duh ia ka shuki CEM ruh, ka jingleh u bah Pynshngaiñ ka long kaba la palat haduh ba u kheiñ ia ka District Council kum ka nongkynti lajong, ka kam CEM kam dei ka kam kamai pisa hynrei ka jingleh jong u kaba la shyrkhei” ong biang u bah Shylla.
U bah Shylla u la ong ba ka jingbym wan ka kynhun PDA ban ia shim bynta ha ka elekshon jied CEM ka dei ka dak kaba pyni ba ki la tieng, “Ka dei ka jingtieng naba ki la leh ia ki kam kiba shyrkhei tam, Ia u nongtuh phim donkam ban beh u phet hi” ong u bah Shylla. Shuh shuh u la thalaiñ ia ka jingpynslem u bah Pynshngaiñ ia ka kam myntri Nongkhlaw kaba la sah la 2 snem mynta ha kaba u la ong, “Ia ka kam myntri Nongkhlaw la pynslem haduh 2 snem, katba ia ka T.28 klur pat tang 5 minit wiak wak la dep kam” u la ong.
Utei u CEM ba thymmai ka KHADC u la takraiñ ruh ia ka kyrtong CEM jong ka PDA ka kong Grace Mary Kharpuri da kaba ong ba ka la pyrshang ban tan jubor ia ki MDC sha ka liang jong ka da kaba thong da ka pisa tyngka. U la ong ba ki don ki MDC kiba la pyni ia ka message ha u bad ha katei ka message ka kong Grace ka la thoh ba kan pynlut ia baroh ki jinglut jingsep kiba dei na ka bynta ki kam shimet jong u lada un wan ai jingkyrshan ia ka, don pat ruh ki jingkynnoh kiba ong ba ka kong Grace ka la thong haduh T.30 lak tyngka ia uwei u MDC ban wan kyrshan ia ka.