2 tarik yn iuhkjat u Lat ha Iewduh

Shillong, 23 Nailur:
U Lat ka jylla u V Shanmuganthan u lah ban leit iuhkjat ia ka Iewduh ka iew ba heh tam ha ka jylla Meghalaya. Katkum ka khubor, u Lat un leit peit ia kane ka iew ha ka 2 tarik Risaw, kaba dei ka sngi kha jong u Mahatma Gandhi.
Un dei u Lat ba nyngkong, lehse ba un leit iuhkjat ia kane ka iew kaba dei ka ktem khaii bah eh duh ha kane ka jylla kaba hap hapoh ka jingpeit bad pyniaid ka Hima Mylliem.
Ha kajuh ka por, ka Hima Mylliem ka sngew tynnad lada u Lat un leit iuhkjat khnang ba un iohi ia ka jinglong ka Iewduh.
Lah ban kdew ba ka Iewduh ka dei ka iew kaba rim bha ha ka jylla, ha kaba ka sorkar ha ki snem ba la dep, ka la pyrshang ban pynthymmai ia ka hynrei haduh mynta kam shym la urlong satia.
Ha ka juh ka por la iathuh ba na ka liang jong u myntri ba dei peit ia ki kam pynroi sor u Bah Ronni V Lyngdoh yn wan ba peit ia ki sawdong sawkun jong kane ka iew ha ka 24 tarik mynta u bnai ban iatreilang bad ka hima bad ka sorkar ba kumno ban ialeh ban wanrah ia ka jingkhuid hapoh kane ka iew.