Shillong: Ka Kiew Pyneh Rngiew sha kliar u Lum Sohpetbneng, ka Seng Khasi Kmie, Shillong kan long ha ka 2 tarik u bnai Rymphang 2020.
Ka kyrwoh lyngba ka Lum Sohpetbneng Committee ka Seng Khasi Kmie, ka pyntip ba ka nguh ka dem na Khyrdop ban kiew sha kliar lum kan sdang ha ka por 7:00 baje mynstep katba ka nguh ka dem ha kliar lum kan sdang ha ka por 9:00 baje mynstep.
Haba iadei bad kane, ka Seng Khasi Kmie, ka shim ia kane ka kabu ban ialap iawer ia baroh ki parakur ki parakha ka bri Hynñiewtrep Hynñiaw Wasa ba kin ia mih paidbah ban sakhi lang ia kane ka sngi bad ruh ban ioh ia ka kyrkhu ka kyrdoh na U Blei Trai Kynrad bad ban ioh rah rneng ruh shi symboh ar symboh u khaw eh u khaw khien ryngkat ka um khuid um suba ban eh ka rngiew ka rwiang.
Ka Lum Sohpet bneng committee, ka kyntu ia ki nongwan ba kin ym bret pathar ia ki mar song jingbam ne ki jakhlia bad ban nym wiang ding klumar ia ka lynti iaid.
Ngi dei ruh ban kit khya shaphang ka jingkhüid u lum Sohpetbnéng. Ī khlem akor ban iohi ba la tap da ki mobile tower ia une u lum kyntang jong ngi. Ngam lah ban khaprip ia une lum bad da ka jingsngew rem. Namar ba nga ju sngew sarong ban pyni ia u sha ki para nongshang pyrthei.
Khublei, U Bah M War