2 tarik ka rai khadduh ka Supreme Court ia ka kam Rangbah Shnong

Shilong, 15 Nohprah:
Ka mukotduma ba la ujor da ka KHADC sha Supreme Court pyrshah ia ka rai ka Meghalaya High Court, ba sloit ia ka iktiar jong ki nongsynshar shnong ha kane ka jylla, kan poi sha ka rai kaba kut noh shen.
Kane ka rai kaba dang iai ap khmih lynti haduh mynta, kan long ha ka 2 tarik Kyllalyngkot u snem ban wan, ha kaba ka Supreme Court kan shim bishar khadduh ia kane ka mukotduma.
Haba iakren bad u chairman ka Synjuk Nongsynshar Shnong ka Bri Hynniewtrep (SNSBH) u Dr Werlok  Kharshiing u la ong ba kyrmen skhem ha katei ka sngi yn nym don shuh ka jingpan por, ka jingpynsangeh.
“Ngi kyrmen ba ngin ioh ia ka rai kaba pynkmen  ha kaba ka Supreme Court kan pynmih ia ka rai”, la ong u Dr Kharshiing.
U la ong ba ka Synjuk ka la sngap jar ha kine ki bnai ba la dep, ka daw,ka long namar ba ki dang ap ia ka rai ban ioh na ka Supreme Court ka ri, kaba ki khmih lynti kan jia long ha ka 2 tarik Kyllalyngkot ban wan ban ioh ia kane ka rai ban iashai noh kdar halor ka bor bad ka iktiar jong ki nongsynshar ha kane ka jylla kynthup ki rangbah shnong.
U la ong ba ka long ka jingshisha ha kine ki sngi, ka la kynjah kane ka kam rangbah shnong hadien shi snem tam mynta.
Mynshem snem, ka KHADC ka la thep ia ka jingujor sha ka Supreme Court ban pyrshah ia ka rai ka Meghalaya High Court kaba pynmih ia ka rai ba ki Rangbah Shnong kim don bor shuh. Kane ka rai ka la pynkhih win ia ka ri Khasi-Jaintia ha kaba ki Rangbah Shnong hapoh ka Synjuk Ki Nongsynshar Shnong ka Bri u Hynniewtrep (SNSBH) mih paidbah ban dawa ba ka sorkar jylla ka dei kan pynurlong noh ia ka Village Administration Bill (VAB) ka KHADC ban pynkup bor ia ki Rangbah Shnong ban lait na kane ka rai jong ka High Court.
Kham mynshwa, u chairman ka SNSBH u Dr  Kharshiing  u la ong ba ka jingpynslem ia ka VAB ka dei ka jingleh ka sorkar ban shu pyntud kai ia ka por bad kim shim khia satia.
Haduh mynta, ka VAB ka KHADC, ka la sahkut khlem pat urlong satia khamtam hadien ba la mih ka jingiapyni bor hapdeng u CEM ka KHADC u Bah Pynshngain N Syiem bad u Myntri Rangbah u Dr Mukul Sangma.
Ha ka hukum ba shipor, ka Supreme Court ka la pynmih ia ka rai jongka ba ki Rangbah Shnong ki la lah ban treikam kumba ju long haduh 6 taiew ban pynbna pat da ka rai kaba kut. Tangba ki dei ban bud katkum ka jingbthah ka District council katkum ka 6th Scheduled.