Shillong, 13 Jymmang:
Ka KSU West Khasi Hills ka la ai por ar taiew ia ka sorkar ban pynneh ia ka Police Outpost ha Kyrshai kaba don hajan Langpih ka West Khasi Hills. Ha kajuh ka por, ka seng ka dawa ba ka sorkar ka dei ban pyndam noh ia ka rai ban buh ia ka ktem ANVC (B) ha Aradonga West Khasi Hills.
Ia kane ka rai la shim ha ka jingialang jong ka seng hynne ka sngi ha Nongstoin. U general secretary ka KSU West Khasi samla Wellesly Lyngkhoi u la ong ba ka Khasi Stu dents’ Union (KSU) West Khasi Hills District Unit ka la rai ban ieng skhem haka juh ka nongrim ban pyr shah beit ia katei ka jngthmu ka sorkar. Ka la ong ba kan sa leit iakynduh kyrkieh markhmat ia ki myntri sorkar ba dei peit ia baroh ar tylli ki deparment kynthup ka Kong Roshan Warjri bad u Bah Sniawbhalang Dhar ban ia kren halor kitei ki mat.
“Ka Seng kala buh por ruh ar taiew iaka sorkar ban buh biang iakatei ka outpost ha Kyrshai”, la ong u samla Lyngkhoi.
U la ong ba ha ka jingshisha ka jingdon jong katei ka Police Outpost ha Kyrshai ka la pynlong ia ki paidbah katei ka thain ban don hapdeng ka jingshong suk bad sngew shngain. Ha ka jingshisha ka sorkar kadei ban ialeh ban wanrah kham bun ki lad jingiada kum ki outpost namar ki paidbad ba shong basah ha ki khappud ki iakynduh shibun ki jingeh.
Ha ka jingshisha ka sorkar kala dei ban pynkiew kyrdan ia katei ka Outpost sha ka police station hynrei sngew diaw bad sngewlynngoh halor ka jingleh jong ka sorkar ban weng noh pynban.
U la ong ba ki paidbah jong katei ka thain mynta ki don hapdeng ka jingshong syier khamtam na ki jingmih jong ki kam thombor ki ba bun man ki sngi ia ki khasi bashong basah ha ki thain khappud. Ka long ka jingsngew lyngngoh ha ka ba wad na kaliang u myntri ki kam pohing barim ha ka sorkar MUA(I) bah H.D.R Lyngdoh ha ki snem ba la dep ha ka por ba dang khih phahloh ka mat halor ka jingjia umsnam ha Langpih ha u snem 2014 u la kular hi hakhmat ki paidbah ban upgrade ia katei ka outpost bad ban buh shuh shuh khambun ki outpost ha ki thain khappud.
Halor ka ktem ANVC(B) ka seng ka pyrshah jur bad ka la pynkhreh iaki prokram iakhih lada ka sorkar kam sngap iaki paidbah ka west khasi hills. Lada ka sorkar ka leh donbor ban buh iakatei ka camp ki lehnoh garo hapoh ki jaka ki khasi ka seng ruh ka hap ban pyrkhat da kawei ka lynti; kata ban ia kieng atiar noh bad ban iarung kam kaikhlaw. Haka ba iadei bad ka jingkren jong ka ANVC(B) ka seng ka kwah ban pynsngew iaki ba ki dei ban sangeh mardor ia ka jinglehdonbor ban wan tur hapoh u pud u sam ka ri khasi.
Na ka liang ka seng kam tieng kam smiej ia ka jingbyrngem bad jingpyntieng kohtympan jong ka ANVC(B). kane hi kajingkren jongki ka pyni ia ka jinglong riewkhlaw bad ka jingsdang lehdonbor iaki khasi wat lada kim pat ioh ia ka jaka sah. Lada ki ong ba ka jingdon ia ka ktem riehtngen ka wanrah development ka seng ka sngewdei ban ong ba la bha iabaroh ki dkhot ka seng ne ki samla ban iarung kam kaikhlaw ban ia ioh lang iakata ka development. Kumta ka sorkar ka dei ban buh ia ka camp hapoh u pud u sam ba hap hapoh garo hills hi.
Phi don ban ong eiei?