2 sngi pakhang shnong ka GNLA ha Garo

Shillong,23 Nailur:
Ka Seng lehnoh Garo National Liberation Council ka ka khot ia ka pakhang shnong ka ba 2 sngi kaba yn sdang naduh lashai ka sngi ka 25 tarik . Ka GNLA ka la khot ia ka pakhang shnong namar ka jingiai bteng ki pulit ban khynra ia ki dkhot ka seng ha kylleng ki thain jong ka Ri-Lum Garo.
Ka jingpynkhlain ki pulit ia ka jingkhynra ha West Garo Hills ka dei hadien ka jingshah pyniap jong 2 ngut ki briew kiba kynthup ia kawei ka kynthei. U SP ka South West Garo Hills District u R Muthu u la ong ba ki pulit ki la pynjur ia ka jingkhynra ia ki lehnoh ka GNLA ka dei namar ka jingkiew palat ka kam pyntriem jong ki ha katei ka thain katba nang mih ki sngi. U la ong ba 2 ngut ki la iap katba uwei pat u la mynsaw jur ha Oidoba kaba hap hapoh ka Garobadha.
U SP u la ong ruh ba ka GNLA ka la phah ia bun tylli ki shithi dawa pisa sha ki paidbah katei ka thain. U la ong ba ka jingpynjur ia ki pulit pahara kiba khynra ha katei ka thain ka la iarap shibun ia ka tnad pulit kaba la ioh ksai ban kem ia ki briew kiba don jingiadei bad katei ka seng bad kumjuh ruh lyngba ka jingioh kem ia ki ki pulit ki la ioh ksai ruh shaphang ka iaid ka ieng ki dkhot ka GNLA.