Nongpoh: Ka nuksa kaba la pyni da uwei u rangbah uba la 62 snem ka rta, uba la mih mynstep bad janmiet ban pynkhuid ia ki bynta ka surokbah kaba don hajan ka Bhoirymbong CHC, lehse kan dei kawei na ki nuksa kaba bha ia kiwei pat ki briew hapoh ka Distrik bad jylla, ba ki dei ban shim ia ka jingkitkhlieh halade, na ka bynta ban wanrah ia ka khuid ka suba ha ki shnong ki thaw bad ki sawdong sawkun.
Utei u rangbah, uba la pyni ia katei ka nuksa kaba bha na kiba bha tam, u dei uba la tip kyrpang kum u Bah Phroi Sohtun, ha kaba watla ha ka rta kaba 52 snem ne ka jinglong tymmen jong u, hynrei u dang smat ban mih mynstep bad janmiet, na ka bynta ban pynkhuid ia baroh ki sawdong sawkun kiba don marjan bad ka jaka kaba u sah, khlem da khein ba ka dei ka jaka jongno jongno, hynrei u pynkhuid hi plain ia baroh ki jaboh jabain.
Haba lap ia katei ka kam babha kaba la pyni da utei u rangbah, la pyrshang ban leit kren ia u bad uba la ong ba ka dei ka kamram jong u ban pynkhuid ia ki sawdong sawkun bad khamtam eh ki bynta kaba ka jaka sah jong u ka jan, namar um lah ban peit haba ki lynti iaid paidbah kin dap da ki jaboh jabain.
U la ong ruh, ba kham mynshwa ka la don kawei ka jaka shwa ban rung sha Bhoirymbong CHC, ha kaba ki paidbah ki la shu bret pathar leit ia ki jaboh jabain bad khlem da don kiba leit ban pynkhuid, hynrei naduh ka por kaba ma u, u la leit ban pynkhuid lut ia baroh kitei ki niut ki nier, mynta ki paidbah ki la shynrain ban bret niut ha katei ka jaka bad kaba la pynlong ia katei ka jaka ba kan long kaba khuid ba suba.
Haba pyrshang ban kylli na utei u rangbah, ba kaei kaba u kwah ban ai ka khubor ne ban kyntu sha kiwei pat, utei u rangbah u la jubab ba um kwah ban kren ei ei ia kiwei, namar lada kren ia kata, kin sa don shibun kiwei ki ban kynthoh kylla ha ki kyntien kiba laiphewjait. Namarkata ngam don ei ei ban kren ne kyntu ia kiwei, hynrei lada ki briew ki kwah ba ki shnong ki thaw bad ki sawdong sawkun, kin long kiba khuid ba suba kin dei ban shim ia ka jingkitkhlieh halade hi.
Phi don ban ong eiei?