Nongpoh: Ki bor pulit ka Ri Bhoi District, hynnin ka janmiet ha ka por 5 baje ei ei, ki la ioh ban bat ia kawei ka kali Renault Kwit kaba don ia u number ML 08 E 3848, ha kaba ki la ioh ruh ban kurup ia 2 kilo ka Ksiar ia kaba la antad ba kan shongdor kumba 80 lak tyngka eiei.
Ka jingioh bat ki pulit ia katei ka kali kaba la kit ia katei ka ksiah, ka dei ruh hadien ba ki la ioh ia ka jingtip kaba thikna halor ka jingdon katei ka kynhun jong saw ngut ki briew, kiba la thmu ban shalan beain ia katei ka Ksiar.
Kitei ki briew kiba iohkem da ki pulit ki kynthup, ki kynthup ia u Tridip Singha (32) na damra, Goalpara District, Assam, u ba dei u nongniah kali bad uba ka kam ialade ba um don jingtip tip eiei halor ka jingthmu shalan tuh ia ka ksiar, nangta u Sagar Pardhan, (35) na Kurseong Darjelling, u Rajiv Adhikary, (45) na Bidhanparly, Kolkotta bad u Ashok Karlie, (43) na Dayaram, Darjeeling.
Haba iadei bad katei ka jingshahkem, u Bah C. Syrti, Superintendent of Police ka Ri Bhoi, u la iathuh, ba ki pulit tang mar iatip halor ka jingdon kitei ki nongshalan beain ia katei ka Ksiar, ki la pynap shrip bad kaba la pynlong ruh ba kin iohkem ia kitei ki saw ngut kiba la suba donkti ha kane ka Kam.
U la ong ruh, ba kumba ka long mynta hi ki pulit kim pat lah ban pynshisha la katei ka Ksiar, ka dei kaba Ksiar kaba shisha ne kaba thok, hynrei watla katta ki pulit kin tohkit na ka bynta ban lap la ka dei kaba shisha ne kaba thok.
Na ka bynta ban lap ia ki jingshisha, na ka liang ki Pulit kin sa pynlong ia ka jingtohkit ban lap ia ki jingshisha baroh halor kitei kiba donkti ha katei ka kam bad khamtam ban lap ia kiwei de kiba donkti lang ban shalan beain ia katei ka ksiar, u la bynrap.
Phi don ban ong eiei?