1tarik Jymmang, dawa pynbna shuti paidbah ki nong bylla

Shillong, 01 Jymmang:
Ryngkat ka pyrthei shi tyllup, ki nongbylla na ki jait kam bapher bapher
hapoh ka lama ka Meghalaya Joint Council of Trade Union& Association (MJCTU&A), ki la pynlong ia ka jingrakhe kaba 128 ia ka sngi ki nongtrei bylla ha ka 1 tarik Jymmang ha ka nongbah Shillong ha kane ka sngi Nyngkong.
Ha kane ka sngi, ki la dawa ba ka sorkar jylla ka dei ban pynbna ia ka 1 tarik Jymmang kum ka sngi shuti paidbah man u snem kum ka dak ban burom ia ki nongbylla sngi.
Ki la dawa ruh ba ka sorkar ka dei ban long kaba treikam bad kaba smat ban tehlakam ia ka jingjur ki kam thombor ia ki kynthei khynnah ha kane ka jylla bad ban pynshitom kaba tyngeh ia kiba donkti.
Ki la kyrshan ruh ia ki jingdawa jong ki nonghikai skul lower primary bad upper primary skul ban ioh ia ka jingsiew kaba biang ba kin ioh ia ka jingim kaba donburom.
Ban kyntiew ne pynheh ia ki jingsiew ia ki nongtrei ha ki tnad bapher bapher ia baroh ki nongtrei.
Ki la dawa ruh ban buh ia kawei ka jaka na ka bynta ki nongiakhih ha kano kano ka bynta jong ka sor Shillong kumba long ha kiwei ki bynta jong ka ri.
Ia kine ki jingdawa la pynsngew da ki nongkitkam ka Meghalaya Joint Council of Trade Union & Association (MJCTU&A) kynthup u President MN Bhattacharjee bad u general secretary u JL Das ha ka jingialang kaba long hynne ka sngi ha jaka ieng kali ha phyllaw ka Additional Secretariat, Shillong ba la wan iashim bynta da ki spah ngut ki nongtrei na ki kynhun bapher bapher kiba pyniasoh bad ka Union.