1tarik Iaiong, shiteng synnia, yn iaid paidbah ki rot na Mawiong sha Nongmynsong; byrthen da ka PIL ia ka sorkar Jylla

Ka jingsylla pyrshah ïa ka Sorkar Jylla ::: Kane kadei ka jingkyang jong ngi kiba shah ban beiñ; kadei ka jingpyrta jong ngi kiba shah ïuhroit!

Pararot,

Ka por ka dawa ba ngin ïeng tylli kawei. Ka jingïakhun jong ngi ka long ban ïoh ïa ka jingïada ba pura. Ki jingeh kiba ngi ïakynduh ki lah neh da ki phew snem mynta bad ngi dei ban ïakhun haduh ba ka Sorkar kan pynbeit noh ploiñ ïa kiei kiei baroh; ym da kaba shu trei thurmur bad thohmut thohmat, hynrei ka dei ban pynbeit lut ploiñ na sdang ha kut.

Ka jingïakhun ka lah sdang bad kaba donkam mynta ka long ban nang pynkhlaiñ shuh shuh ïa ka jingïakhun. Ha kane ka jingïakhun, ngi donkam ruh ban phai dien kumno ngi sdang ïa ka jingïaleh jong ngi bad ha kane ka rukom kan nang ai bor ai mynsiem ïa ngi ba ngin ïakhun haduh ba ngin da ïoh ïa ka jingjop bad ban weng noh shisyndon ïa ki jingeh jong ngi baroh.

Mangi kum ki nongïalam jong ka Rot Association of Meghalaya lyngba kane ka pyrta, ngi pynsngew hakhmat u Myntri Rangbah jong ka jylla, u Conrad Kongkal Sangma ha kaba ïadei bad ka hok kamai ja kpoh jong ngi lane ka “right to livelihood” ba ngi ruh kum ki ‘thei nuti ngi dei ban ïoh katkum ba la pynkhamti ha ka riti synshar jong ka Ri.

Ngi pynsngew ruh ha u Myntri Rangbah ba lada ka Sorkar Jylla kam kloi ban ithuh noh da ka aiñ ïa ka kam khaïi met ha ka jylla Meghalaya, kan sa poi ka por ba ha kum kane ka juk kyrduh kam, u duk u suk – u rangli u juki kin ïap ei baroh. Bad lada kum kane ka apot kan wan jia ha kane ka jylla jong ngi, ki nongbahkhlieh kin long ki nongthawaiñ ka jylla hi.

Ngi kyntu ïa u Myntri Rangbah ba un shim khia ïa kane ka mat kaba la shu sahkut sah hajuh shi hajuh bad ban pynurlong noh shisyndon. Lada ka Sorkar Jylla kam sngap pat ïa kane ka jingdawa ka jong ngi, mangi kum ka synjuk ngin ïaid shakhmat ha kaba ngin ujor syndon da ka Public Interest Litigation (PIL), hakhmat ka Meghalaya High Court.

Ka Rot Association of Meghalaya, ka synjuk jong ki ‟’thei nuti bad ki ‘rang die met ka khot ka wer ïa phi ki pararot baroh ban ïasnoh kti lang bad ïadon ryngkat ha ka jingïaïaid paidbah ka ban long ha ka 1 tarik u Ïaïong, 2021 ha ka por 12 baje shiteng synñia na Mawïong Rim sha Nongmynsong ha kaba ka synjuk kan ai jingpynshai ïa ka nongrim ba ka ïeng.

Ka RAM ka khot sngewbha ruh ïa ki nongïalam jong ka STIEH bad HNYF (Women’s Wing) bad kumjuh ruh ïa I Pastor Dunai, Adelbert Nongrum bad Allantry Dkhar ban ïadon ryngkat. Sngewbha message ïa ngi ha ka Telegram group jong ngi (@RotAssociationOfMeghalaya) lada phi kwah ban ïakren ïasyllok bad ngi ha rynsan jong ka internet. Khublei!

I. Kharmuti (President), P. Mylliemngap (General Secretary) & D. Mawlong (Publicity Secretary)

Rot Association of Meghalaya (RAM)
Headquarters: Nongmynsong, Shillong – 793019
Meghalaya, East Khasi Hills – India