1taiew shongdum ha Mawkliaw

Shillong, 9 Jylliew:
Ka por lyiur ka dei ka aiom kaba ki paidbah ka shnong Mawkliaw bad ki shnong ba sharum jong ka kum ka Nongjri bad kiwei ki ju mad ia ka jingsohsat namar ka jingthut palat ka bording ha katei ka thain. Mynta u snem ruh la iathuh ba tang mar ia mih ka aiom lyiur ka jingthud ka bording ha katei ka thain ka la long palat liam, ha kaba ha ka shisngi ki paidbah ki ioh ding tang kumba 3 ne 4 kynta, ki trai shnong na katei ka shnong ki la iathuh ba naduh ka sngi palei jong ka taiew ba la dep haduh kine ki sngi mynta ki paidbah katei ka thain kim ioh ding satia, bad kim iohi syrngiew bording tang shi kynta ar kynta ruh ha ka shisngi.
La iathuh ba ki shnong kiba la shah ktah ha katei ka jingthud ka bording ha katei ka thain ki kynthup naduh Mawbeh, Mawlam, Mawkliaw, Diengsiar, Rana,Nongjri bad ter ter ki shnong kiba kham sharum. La ong ba haduh kine ki sngi wat la ka la jan dap shi taiew pura lynter ym pat don ba patiaw satia.
Katei ka jingbym don bording la jan shi taiew ka la pynduh jingeh ia ki paidbah ha kiba bun rukom ha ki kam ing kam sem jong ki bad la ong ba ki paidbah ki hap ban pynlut bun bun tyngka ha ka shi taiew tang ban ioh pynkdang ia ka battery ka mobile phone jong kid a kaba leit ban pynbam ding ha ing jong ki briew kiba buh generator ha kaba ki hap ban siew kumba T.20 tyngka shisien ai ding.
Haba ia kren bad u nongthohkhubor, ki briew na katei ka shnong ki la pynpaw ia ka jinglyngngoh namarba baroh shi katta haba don ka jingthud bording ki briew kiba peit ha katei ka thain ki ju ai jubab ba ka dei na ka daw ka jingjur slap hynrei mynta pat ki ong ba u slap u duna ym kumba baroh shi katta bad ha kane ka taiew lei ki la iathuh ba ym don slap satia, hynrei ka bording kam don haduh ba thoh ia kane ka khubor.