1taiew ai por ia ka ophis SDSEO Mawkyrwat ban siew tulop nonghikai

Nongstoin, 24 Naitung:
Ka Synjuk ki Nongsynshar Shnong Warsan Lyngdoh Area, ka la dawa na ka ophis jong u SDSEO, Mawkyrwat, ba ka dei ban pyllait noh mardor ia ki tulop jong ki nonghikai jong ka thain 18 Shnong, namar ba ki nonghikai skul katei ka thain, ki la shu leit hikai shah thngan khlem ka jingioh tulop mynta ka 5 bnai kynthih.
Kat kum ka kyrwoh ba la phah da U bah AK Bani Secretary ka Synjuk la ong ba na ka liang jong ka Synjuk ka ai por ruh ia ka ophis jong u SDSEO Mawkyrwat 1 taiew, ban pyllait noh ia ka tulop jong ki nonghikai bad lada kam lah ban leh ei ei ha katei ka por ba la buh, ka Synjuk, kan sa leit ruh ban wad ki lad jingiarap na ki bor ba halor bad ki bor jong ka ain ban tuklar lem halor ka jingshah leh bein jong ki nonghikai katei ka thain.
Shuh shuh u bah Bani u la ong ruh ba ka Synjuk ka dap ruh da ka jingsngew lyngngoh hadien ba ka sorkar Jylla lyngba u Director jong ka Education Shillong, ka la bthah ia u Sub-Divisional School Education Officer, Nongstoin ban aiti noh ia baroh ki kam School, katei ka thain sha South West Khasi Hills, naduh u bnai Rymphang 2016; hynrei haduh mynta ka ophis jong u S.D.S.E.O Mawkyrwat, kam shym pat la lah satia ban leh ei ei. Kam dei tang katta, hynrei ka ophis jong U SDSEO Mawkyrwat kam shym la lah satia ban shna tang ia ka tulop ki nonghikai khamtam ia ka Deficit Dchool, Contract Basic bad Adhoc School la 5 bnai mynta bad katei ka paw shai ruh ba ka dei tang ka jingbym shimkhia jong ki nongtrei ka ophis u S.D.S.E.O. Mawkyrwat ong u bah Bani ha ka kyrwoh.
Ha kajuh kapor ka Synjuk ka pan ruh ia ka jingpynshai na ka ophis jong u Deputy Commissioner Supply South West Khasi Hills, ban pynshai na ka bynta ka skhim National Food Security Act, namar ba katei ka thain kam pat ju ioh ia u khaw bad u shini reshon naduh bala pyntreikam ia ka ain NFSA hapoh ka Jylla.
Ha kaba iadei pat bad ka um phniang sharak katei ka Synjuk kala pynpaw ruh ba naduh ba la phah ia ki sha South West Khasi Hills, ka um phniang sharak ba ki dei ban ioh kumba ju ioh mynshwa na Nongstoin, ruh la shah khate noh da ki spah liter ha ki nongsam jong ka ophis Supply Mawkyrwat
Kumta na ka liang jong ka Synjuk ka la pynpaw ba lada ka ophis Supply Mawkyrwat, kam lah ban ai jingpynshai ha kaba iadei bad kitei ki skhim, na ka liang jong ka Synjuk kan sa leit ban wad jingtip na U Director Supply Meghalaya Shillong.