Nongstoiñ: U MLA ka Sohra u bah Gavin M. Mylliem u ba long ruh kum u chairman ka KVIB ka sorkar Jylla u la wan ban pynhap pyrda noh ia ka lympung kynjatbol kaba la tip kum ka 1st Knock Out Football Tournament 2018, bala pyniaid da ka Kynshi Bangla Social & Cultural Sport Club ( KBSCSC) ha kaba ka kynhun ialehkai jong ka Jongngi FC kala ioh ban khur ia ka nam kum ka lahduh.
Haba phai sha ka jingiakhun phainal jong katei ka lympung mynta u snem kaba la long hynnin ka sngi ha ka madan ialehkai jong ka shnong Kynshi Bangla kaba la long ruh hapdeng ka kynhun ialehkai jong ka Jongngi FC pyrshah ia ka kynhun ialehkai jong ka Solid Target FC kala long shisha ka jingialehkai kaba itynnad haduh katta katta bad ka nam jop kong ka Jongngi kala wan hadien ba kala lah ban pynliem noh ia ka Solid Target da 1 kol la 0.
Ia katei ka kol kaba kynsai jong ka Jongngi FC la ioh ban thep da u Wallam Nongkhlaw u ba khlem pynlehnoh ei satia ia ka kabu ksiar kaba u la ioh ha ka minit kaba 8 jong ka kylla step bad lyngba katei ka 1 kol u Wallam ka Jongngi kala ioh syndon ban khur ia ka nam lahduh ha katei ka lympung.
Ha katei ka sngi ia ka nam best Coach la ioh ban khur na ka Langsning FC, Best decipline team Army FC, Swift players of the match Bansharai Sun na ka Jongngi FC , best Goalkeeper Maitshaphrang Kharmuid na ka Jongngi FC bad best palyers la ioh ban khur da u Wallam Nongkhlaw na ka Jongngi FC.
Shuh shuh ha katei ka sngi ka Jongngi FC kum ka lah duh ka la ioh ban khur ia ka song pisa kaba 2 lakh tyngka katba ka Solid Target FC kaba la wan ba ar kala ioh ban khur ia ka song pisa kaba 1 lakh tyngka.
Nalor u kongsan ha katei ka sngi pynhap pyrda ia katei ka lympung la don lang ruh u bah Brolding Nongsiej MLA Mawthadraishan, A.Nongbri SDO Mairang , Samla Benningstar Lyngkhoi, Bah H.Kharkongor SDPO Mairang, Bah Bah Jana SDPO Sohra, Rejrnder Singh RSM Amrit Cement, Vijay Singh Pachar SP Amrit Cement, bah Aiban Syiemlieh president baf secretay bah David Diengdoh bad kiwei kiwei kiba la sam ruh ia ki khusnam.
Shuh shuh ha katei ka sngi na ka liang ka KBSCSC ka la la ioh ruh ban pynkup burom ruh ia u klur ia mareh marathon ka Jylla u bah Benningstar Lyngkhoi.