1hajar ngut kiba iap ha Uttarakhand

Dehradun, 23 Jylliew:
Ki tnad ai jingiarap jong ki bor shipai Army ki dang bunkam ban thwet ia bun bah ki briew kiba dang jah rngai ha ka jingjia shlei um ha Uttarakhand, haduh mynta ki bor shipai ki dang pynlong ia ka jingwad bad ka jingai jingiarap ban pyllait im bad ban sei ia kiba iap ha ka jingjia ha Kedarnath.
U Myntri Rangbah ka uttarakhand u Vijay Bahuguna u la ong ba ka jingiap briew ha katei ka jingjia haduh mynta ka lah ban poi sha ka shihajar ngut eiei, ha ka jingleit leit jngoh jong u ia ki tnad shipai kiba dang ai jingiarap ha katei ka jaka. Ka jingtip na ki pulit, ka iathuh ba la ioh ba ka jingiap ka lah ban tam ia ka hajar ngut namar ba ki dang ia sei shi sei ia ki met iap.
U Lt Gen Anil Chait, commander-in-chief jong ka army’s Central Command, uba la iadonlang ha ka jaka ba ki shipai ki dang pynlong ia ka jingai jingiarap u la ong ba ki shipai kin pyllait im bad sei ia iwei pa iwei kiba la sahkut ha katei ka jaka watla ki long ki jaka kiba long lum bad kham eh. U la ong ruh ba kumba 8500 ngut ki shipai lum bad ki shipai ai jingsumar la phah ha katei ka jaka. U la ong ruh ba haduh mynta ki shipai ki la io ban iarap ban pyllait im ia ki 18 hajar ngut ki briew kiba la shah ngat ha ki jaka jong ka Gangotri, Joshimath, Badrinath, Kedarnath bad Pindari glacier.
Ka tyllong khubor ba la iohlum la iathuh ba ka don ka jingma kaba khraw ha katei ka jingjia shlei um kaba shyrkhei ha katei ka jaka ha kaba ka don ruh ka jingartatien ban dang ioh pyllait im namar ka jinglong jong ka suinbneng, ha kaba ki nongpeit suinbneng ki la batai ba u lapbah ba jur u lah ban hap hapoh kine ki ar-lai sngi ha katei ka jaka hynrei na ka liang ki bor shipai ki la kut jingmut ba shuwa ban poi u lapbah kin lah ban pyndep khambun ia katei ka kam.
Nalor ki shipai Army la ia don bynta lang ruh ki pulit Indo-Tibetan Border Police (ITBP) bad ka National Disaster Relief Force (NDRF) kiba dang bunkam ban ia shna ia ki lynti thymmai ha ki riat ki ram khnang ba ki briew ba la ioh pyllait im kin ioh ban iaid.
Ka khubor ba dang shu iohlum la iathuh ruh ba ka jingiap ha katei ka jaka ka lah ban poi sha ka 5 hajar ngut.