Shillong, 12 Risaw:
Ka Meghalaya SSA Schools Association (MSSASA) Jaintia Hills District kala rai ban ai ka jingkyrshan bad ban iasnohkti lang ha ka jingiaid Rally kaba jai jai jong ka All Meghalaya SSA Schools Teachers Association (AMSSASTA) ka ban long ha ka 19 tarik mynta u bnai. Ia kane ka rai la shim ha ka Executive Committee jong ka Association kaba la long ha ka 25 tarik u bnai Nailur 2015 ha Circuit House Conference hall Jowai, ha kaba ki Presidents, Secretary bad ki dkhot ka Executive Committee na Thadlaskein, Laskein, Khliehriat, Saipung bad Amlarem Block ki iadonlang.
Kum ban shu pynkynmaw ka Sorkar ha u snem 2013, katkum ki rai jong ka Executive Committee ka Sorkar jylla, bad ka Project Approval Board (PAB), 2013 (Government of India), Ministry of Human Resource & Development (Department of School Education and Literacy), kala kyntiew ia ka tulop jong ki nonghikai SSA na ka T.6000 tyngka sha ka T. 9200 tyngka ia ki Lower Primary bad T.6000 tyngka ka T.9900 tyngka na ka bynta ki Upper Primary, hynrei ia ki nonghikai (4th teachers) kiba hikai ha ki Upper Primay pat ka Sorkar Jylla ka pynneh kumjuh kata T.6000 tyngka naduh u snem 2013 haduh mynta wat la ki trei kajuh ka kam ban shakri ban ai ia ka jingnang jingstad hapoh ka jylla.
Ha ka jingiakynduh jong ka MSSASA Jaintia hills District ia u Director ka School Education bad Literacy Meghalaya u Shri Ambrose Ch. Marak ha ka 4 tarik u bnai Nohprah 2013 ha ryngkat ki jingthoh katkum ka shithi no. MSSASA – JHD/Gen/2013-2014/42 dated Jowai the 4th December 2013 ban iakren halor ka tei ka ishu jong ki nonghikai (4th teacher) kaba la ai kopi ruh sha u Deputy Chief Minister In-charge Education Department bad sha u Principal Secretary Education Department jong ka Sorkar jylla, u Director u la kular ban shim khia bad ban phah ia ka jingtyrwa sha ka sorkar. Shuh shuh ha ka 20 tarik u bnai Kyllalyngkot 2014 ka Association ka la leit ia kynduh biang ia u Director ka DSEL ban buddien ia kane ka juh ka issue, ha kaba na ka liang jong u, u la pyni ia ki kot ki sla ba la dep ban phah ia ka jingtyrwa ban kyntiew ia ka tulop ki 1521 ngut ki nonghikai (4th teachers) hapoh ka jylla sha u Special Officer to the Govt. of Meghalaya Education Department katkum ka shithi no. DSEL/EL/GB/Adhoc-UPS/2013/49 dated Shillong the 20th December 2013, ha ka 23 tarik u bnai Jymmang 2014 ka Association ka la leit ia kynduh biang ia u Director ka DSEL, bad na ka liang jong u, u la phah biang ia ka shithi pynkynmaw sha ka sorkar Jylla katkum ka shithi no. DSEL/EL/GB/Adhoc-UPS/1/2013/66 dated Shillong the 29th March 2014 halor ka proposal ban kyntiew ia ka tulop ki nonghikai (4th teachers), u Director u la pynkynmaw biang ia ka sorkar ban leh ei ei halor ka issue ki nonghikai (4th teachers) katkum ka shithi no. DSEL/EL/GB/Adhoc-UPS/1/2013/71 dated Shillong the 5th July 2014, u la ong ruh ba ki kot ki sla mynta ka don hapoh ka tnad pla tyngka bad planning department, hynrei katei ka Associtaion ka la pynpaw ia ka jinglyngngoh ba wat hadien ba u Dr R.C.Laloo Deputy Chief Minister in-charge Education Department ka Sorkar Jylla u la dep ban iathuh bad kular ha khmat ki nongialam ka All Meghalaya SSA Schools Teachers Association (AMSSASTA) ba la dep lut ban leh ia kaba donkam baroh bad sah satang shisien ban iashong jingialang bad u Myntri Rangbah ka Jylla bad ka kam kala dep, hynrei haduh mynta ym pat lah ban kyntiew ia ka tulop jongki, bad ka shu sah tang ha ki jingphohsniew ia ki 1521 ngut ki nonghikai (4th teachers) kumjuh ia baroh ki nonghikai SSA hapoh ka jylla.
Ka jingpynslem ka sorkar ban kyntiew ia ka tulop jong ki ka buh ia ki nonghikai ha ka jingeh kaba khraw ban pyndap pynbiang ia ka ing ka sem bad kiwei de ki jingdonkam ha ka jingioh kaba T.6000 tyngka , bad da kawei ka jingmut kala rai ban ai ka jingkyrshan ia ka Rally ba la khot da ka All Meghalaya SSA Schools Teachers Association (AMSSASTA) bad ka kyrpad ruh ia baroh ki nonghikai SSA hapoh ka East bad West Jaintia Hills bad ruh ia ki 12,481 ngut ki nonghikai SSA hapoh ka jylla baroh kawei ban iamih paidbah ha ka 19 tarik mynta u bnai ban iasnohkti lang khnang ba kane ka Peace Rally kan long kaba jop, ong u Bah Aris C. Rymbai President ka Meghalaya SSA Schools Association (MSSASA) Jaintia Hills District.
Phi don ban ong eiei?