Shillong,15 Nailur:
Hadien bala kut ka 5 sngi ba ka Hynniewtrep Achik National Movement ka la ai por ia ka tnad pulit ban pylait ia 3 ngut ki dkhot ka seng kiba la shah kem kynthup ia u President ka Balat Circle u samla Khraw bok Rangdkhiew, u John Syiemlieh bad u Stadbor Dkhar, katei ka seng jong 5 tylli ki Circle kiba kynthup ia ka Sawsymper, Mawsynram, Lawbah, Balat bad Ranikor, ki la pynbna ba kin pynlong da ka jingiakhih kaba tyngeh ha kaba kin sdang ia ka pakhang shnong ba 12 kynta ha ka 19 tarik mynta u bnai bad ka pakhang ophis ha ka 20 tarik mynta u bnai , bad katei ka pakhang ophis kan treikam tang ha ki ar tylli ki Block kata ka Mawsynram bad ka Ranikor C&RD Block.
“Ka 5 sngi ba ngi la ai por ban pyllait ia ki dkhot ka seng ka la kut, kane ka dei tang ka jingsdang bad lada ka tnad pulit ka dang kuman ngin pynlong da kiwei pat ki jingiakhih ba kham tyngeh” ong u Chief Organizer jong ki 5 tylli ki Circle u Bah B.Syiemlieh. U Bah Syiemlieh, u la ong ba ka seng kam kwah ban pynlong da ki jingiakhih namar ba kan ktah ia u duk u suk jong ka Ri hynrei ka la kynnoh ba dei ka tnad pulit hi ka ba la pynbor ia ka seng ban pynlong da ki jingiakhih.
Halor katei ka pakhang shnong bad ka pakhang ophis ka seng ka la kyrpad ia ki paidbah bad ki nongtrei sorkar ba kin ia shim bynta lang ha kaba ka la pynbna ba ia ka pakhang shnong yn sdang naduh ka por 5 baje mynstep haduh ka por 5 baje janmiet.
Lah ban pynkynmaw ba lai ngut ki dkhot ka HANM ki la shah kem ha ka 30 tarik u bnai ba la dep namar ka jingkhynra mynder ha kaba ka seng ka la ong ba ki dei kiba la thmu ban leh bylla be-ain sha ki thain Nongjri- Borsora khlem ki kot ki sla kiba biang.
Phi don ban ong eiei?