19 ki longing na thain Mawkynrew bad sa kiwei na thain Sohra, ki la iehnoh na ka niam Khristan bad wan phai sha ka niam Khasi

Shillong:Katto katne tylli ki longïing ki la wan phai biang sha ka niam Khasi niam tynrai ha kawei ka shnong ha ka thain Sohra.
Kine ki longïing ki la rai ban wan phai biang sha ka niam Khasi niam tynrai hadien ba ki la don ha ka jingngeit jong kiwei ka niam ka Balang Khristan.

Dang ha kane ka taiew, la pdiang sngewbha ia ki sha ka Niam Khasi da ki rangbah bad ki longsan na ka Sengbah ki Nongshat Nongkhein ka Bri u Hynniewtrep. Ki nongshat nongkhein ki riew tymmen riewsan, ki la hiar sha katei ka shnong, ban pyndep ia ka jingleh niam leh rukom, kumba ka dei ban long, hadien ba kine ki longïing ki la wan phai biang sha ka niam tynrai.

Ki nongialam ka sengbah ki nongshat nongkhein ha ka jingialam u bah Pran Jala, bad kiwei, ki la pyndep ia kaba dei ban leh halor kane ka jingwan phai biang jongki sha ka niam Khasi.
La ioh jingtip ba ki dang don shuh kiwei kiba la khreh ban phai biang sha ka niam Khasi, ha kaba ki nongialam ka Sengbah Ki Nongshat Nongkhein kin leit ban pyndep ia ka niam ka rukom.
Ha ka taiew ba nyngkong mynta u bnai, kumba 19 tylli ki longïing kiba kylla sha ka Balang Khristan na ka thain Mawkynrew ki la wan phai biang sha ka niam Khasi. Ia kine ki longïing la pyndep ia ka jingleh niam leh rukom da ki nongshat nongshat na ka sengbah.