189ngut ki bym mon kyrtong ha Nongstoiñ

Shillong, 24 Naiwieng:
Ki la don haduh 189 ngut ki nongthep vote ka Nongstoiñ konstitwensi ki bym shym la mon ia baroh saw ngut ki kyrtong kiba la ia iareng ha kane ka elekshon shiteng samoi ka ban wan, ha kaba kim shym la thep ia ka vote jong ki shano shano ruh hynrei ki la thep ha u NOTA (None of the Above).
Ki la don haduh 24, 191 ngut ki nongthep vote kiba la leit ban thep vote ha Nongstoiñ ha ka 21 tarik u naiwieng, bad na kitei 24,002 vote ki leit sha ki saw ngut ki kyrtong katba 189 ngut pat ki la thep ha u NOTA. Lah ban pynkynmaw ba la sdang ban buh da u NOTA ha ki EVM ha kane ka jylla naduh u snem 2014 ha kaba la ong ruh ha utei u snem ba ki konstitwensi kiba jop u NOTA kin hap ban ia khun da ka elekshon kaba thymmai.