1,729ngut kiba iap bad 6hajar ngut kiba shitom ring mynsiem ha Syria

Damascus, 22 Nailar:
Ka nongbah baroh kawei, ka la kynjah jar, kaba don ha syndah jong ka Damascus bad katei ka dei hadien ka jingshah pyniap haduh 1,300ngut ki riew paidbah, kiba dang thiah lyngngai ha la iing, ha katei ka step ba sniewbok.
Ha ki surok bah, kiba la thylli, la dei ban tei ia ki dara, ban buh ia ki met iap jong ki briew, ki shynrang, ki kynthei, ki khynnah, kaba la pynlong ia ka pyrthei, ba kan khie bitar lep ia ka Syria, halor katei ka jingsiat da ka lyer bih, ia la ki jong ki briew.
Ka jingpyneh jong ki ar tylli ki Ri, ka China bad ka Russia, ka la pynmih ia ka jing ia tan tyllai kaba jur bad ki ri sepngi, ha kaba ka la pynlong, ba kim lah ban shim ia ki rai kiba tyngeh, ha kaba dei ban leh pyrshah ia ka Syria.
Ka jingialang jong ka UN, kam shym la nud satia ban phah ia ki pyrman jongka, kiba don mar syndah jong katei ka jaka ba shah hiar thma, ba kin leit sha katei ka jaka, kaba don ka jingshah siat er bih, namar ba ka Russia bad ka China, kim ailad ba ki ri sepngi, kin shim ia ki rai kiba tyngeh ia ka sorkar Syria, kumba ki la khanglad ruh, mynshwa, halor katei hi kajuh ka phang.
Ka Russia, ka kynnoh, ba katei ka jinghiar thma, ka dei namar ka jingpynkhie bitar jong ki shipai liang pyrshah, ia ki shipai jong ka sorkar Syria.
Na ka liang jong ki riew pyrshah jong ka sorkar Syria, ki iathuh ba ka jingiap jong ki briew, kan lah ban nang kham bun, ha kaba la iathuh, ba la lap shuh ia ki met iap, na ki bynta jong ka Zamalka, ha kaba la lap ba ki don ki briew, kiba la iap baroh baroh shi iing.
U Fahad Almasri, uba dei u nongkren jong ka Free Syria Army ha Paris, u iathuh ba kiba iap, na ka jingkhein ba ki ioh ma ki, ka long 1,729ngut bad nangta sa kiba shitom ban ring bad pynhiar mynsiem, ki don mynta palat ia ka 6hajar ngut, hadien katei ka jinghiar thma, da ki roket.
Kham mynshwa, ha u snem 2012, U President Obama, ula maham tyngeh, ia ka Syria, ba kan pyndonkam ia ka lyer bih, namar ba u ong ba katei kan long ka jingiaid palat jongka, ba kan jam ia u lain saw jong ka jing ia pyni bor; hynrei haduh mynta ka White House, kam shym la kren shai, ia kaei ka jingthmu jongka, ban leh ia ka Syria halor kine kiei kiei.