Shillong, 15 Nailur:
Ki sengbhalang ha ka jylla ki la pynjur shuh shuh ia ka jingiakhih ban dawa ia ka Inner line permit (ILP), da kaba pyn bna biang ia ka jingiakhih naduh ka 17 tarik Nailur da ka pakhang ophis mynsngi bad pakhang surok mynmiet haduh ka 19 tarik, katba ka pakhang shnong kan long ha ka 20 tarik Nailur.
Ha ka 17 tarik, ha dien ka pakhang ophis mynsngi, kan bud sa ka pakhang surok miet naduh 7 baje mynmiet haduh 5 baje mynstep bad naduh ka por 9 baje mynmiet haduh 5 baje mynstep ha ka 19 tarik.
Katba ka pakhang shnong kan long ha ka 20 tarik naduh ka por 5 baje mynstep haduh 5 baje mynstep ka 21 tarik ban long 24 kynta.
La pynlait noh ha ka 18 tarik namar ba ka dei ka sngi Unitarian Day.
Ki sengbhalang ki la pynbna biang ia ka jingiakhih hadien ba la dep ka pa khang shnong, ka pakhang ophis bad pakhang surok miet ha kine ki sngi ba la dep.
U Vice President ka KSU u samla Frederick Kharmawphlang u la pynbna ia kane ka sien jam ka jingiakhih ha kane ka sngi u Blei, hadien ba la shong jingialang ha ka miet sngi Saitjain.
Haba pynlait khubor mynta ka sngi u Blei, u Vice President ka KSU u la ong ba donkam ban weng noh ia ka ‘Sang bad ka Ma’ kaba la sohkyrdot la bun snem hapoh ka jylla. Ban poi sha ka thong, ka dei ka jingieng tylli jong baroh u paidbah hapoh ka jylla.
U la ong ba ki seng bhalang kin ym pyndem haduh ba ka jingdawa ban pyntreikam ia ka ILP kan urlong ha kane ka jylla.
“Para ri, ngi dei ban sngewthuh ba ka jinglong trai ri ki trai jylla kam slem shuh ban duh noh lada ngin shu ia khnium, hynrei to ngin shah shitom bad mih shakhmat ban ieng ha kawei ka nongrim ba ngi kwah ia ka ILP ba kan treikam noh mardor ha ka jylla”, la ong u samla Frederick.
U la ong ba ki sengbhalang kin ym kynrandien da lei lei katba ka sorkar kam pyntreikam ia ka ILP bad la kyntu ia baroh ki dkhot jong ki sengbhalang bad ki paidbah ban mih khlem jingtieng haduh ban ioh ia ka jingdawa. “Ai kan jia katba jia hynrei ngin ieng skhem ha ka nongrim ba ka sorkar ka dei ban pyntreikam ia ka ILP”, u la ong.
Phi don ban ong eiei?