16 tarik yn tur ki Rangbah Shnong  sha ing u Lat

Shillong, 13 Nailur:
Ka Executive Committee jong ka Synjuk ki Nongsynshar Shnong ka Bri U Hyn niewtrep ha ka jingialang jong ki kaba la long ha ka 12 mynta u bnai ka la shim ia ka rai ban pynlong da ka jingiaiaid paidbah ha ka 16 tarik mynta u bnai tawiar ia ka iingsah u Lat ka Raj Bhawan, shuwa ia katei ka jingiaid paidbah kan don ka jingialum lang baroh ki Rangbah Shnong ha lyndet ing u Lat ha All India Radio ha ka por 11 baje mynstep bad nangtei kin mih bad iaid tawiar ia ka iing u Lat.
Ka kyrwoh khubor na ki nongialam ka Synjuk Ki Rangbah Shnong ki la kyntu ba kiba dei na Sor bad khapsor ki dei ban mih mar 10 ngut na kawei ka Dorbar katba ki Dorbar kiba khamrit la kyrpad ba kin ia mih katba ki kot bor. Ka kyrwoh ka la ong ruh ba kane ka dei tang ka dak ka jingsdang ban pyrshah ia ka jingpynsahteng u Lat ban mynjur noh ia ki Bill ka KHADC bad JHADC, ban pyrshah ia ka jingkuman ka sorkar ban weng noh ia ka Ordinance, ban pyrshah ia ka jingthmu wanrah ia ka Draft Bill bad ban pyrshah ruh ia ka jingbym weng ka sorkar ia ka hukum kaba ia dei bad ka jingkyntur pud ka MUDA.