15tarik, khot ka sorkar ia ki sengbhalang

Shillong 08 K’Lyngkot:
Ka sorkar jylla ka la phah ia ka shithi sha ki sengbhalang ba iakhih ban dawa Inner Line Permit (ILP) ba kin wan iakren ha ka 15 tarik Kyllalyngkot por 11 baje mynstep.
“Ngi la phah shithi sha ki sengbhalang hynnin ka sngi”, la ong u Myntri rangbah ka jylla u Mukul Sangma hynne ka sngi Balang.
U Mukul u la ong ba ka jingialang ka long ban iakren ia ki kam wanrung ki briew nabar ha kane ka jylla. Katkum ka jingong u Mukul, ka jingialang kam dei ban iakren ia ka ILP, hynrei kan long ban iakren bad ban wad ia ki lad ki lynti kumno ban ialeh ban tehlakam ia ka jingwan rung ki briew nabar sha kane ka jylla.
Lah ban kdew ba ki 13 tylli ki sengbhalang ki la pynlong ia ka jingiakhih ha kane ka kylla la 3 bnai kynthih ban dawa ban pyntreikam ia ka ILP ha kane ka jylla.