15tarik, jingialang khatduh ka sub Committee 8th Schedule

Shillong, 03 Jylliew:
Ka Sub Committee kan sa shong jingialang biang ha ka 15 tarik jylliew ha shwa ba kin aiti ia ka kaiphod jong ka 8th Schedule sha ka High Level committee khnang ba kan pynrung noh ia ka ktien Khasi ha ka khyrnit ba phra jong ka riti synshar ka ri India.
“Ngi la jan dep dep ban pynkhreh ia ka kaiphod bad ngi la buh ban pynlong jingialang ha shwa ban leit aiti ia kane ka kaiphod sha ka High Level committee,” la ong ka Director ka Arts and Culture ka kong Matsiewdor haba kren hynne ka sngi sha ki nongthoh khubor.
Ka kong War ka la ong ba ka High Level committee kan sa leh ia kaba donkam hadien ba ngi ladep aiti ia ka kaiphod.
Ki dkhot jong kane ka sub-committee ki kynthup ia u Executive Chairman ka MBOSE u bah E.P. Kharbhih, u Dr. Sylvanus Lamare na ka Sahitya Akademi  bad u S. Quotient Sumer u dkhot barim ka Sahitya Akademi.
Ka sorkar jylla ka la thung ia kane ka komiti na bynta ban pynsted ia kaner ka kam ban pynrung noh ia ka ktien Khasi ha ka khyrnit ba phra ka riti synshar ka ri India. Ia kane ka komiti la khlieh da u symbud Myntri Rangbah u RC Laloo kaba don 15 ngut ki dkhot.
Kiwei ki skhot jong kane ka komiti ki kynthup ia u Dr Sylvanus Lamare na Sahitya Academy, u Dr DRL Nonglait na ka Khasi Authors’ Society (KAS) uba dei ruh u Head of Department jong ka Khasi ha NEHU, u Dr Streamlet Dkhar u Secretary ka  tnad kam ain uba dei u Principal secretary ka arts and culture.  Nalor u bah Laloo bad ka kong War, kiwei pat ki dkhot  ki kynthup ia  ka Kong Ampareen Lyngdoh, u Bah Pynshngainlang Syiem, u Bah Paul Lyngdoh  bad u Bah Witting Mawsor.