Shillong, 15 Jylliew:
Ki don kumba 150 ngut eiei ki briew ba shah ktah ha ka jingjia na ka bor jong ka mariang ha ka thain Pynursla kaba la jia ha u bnai Iaiong mynta u snem.
Katkum ka jingtip na ka bor sorkar, la iathuh ba ia kine kiba shah ktah ha ka bor jong ka mariang, ki dei kiba la phah na ka ophis jong u BDO ka Pynursla ba la phah sha ka Disaster management ka sorkar.
Kine ki jingjulor ki kyntthup naduh ki iing ki sem, ki jingdon jingem, ki mar rep mar riang bad kiwei de. Hynrei haduh mynta, la jan dap ar bnai pura, kine ki briew kim pat ioh jingiarap eiei haduh kine ki sngi bad ki dang sah ha ka jingap khmih lynti ban ioh jingiarap na ka sorkar jylla.
Ha ka jingiakren u nongthoh khubor bad ki katto katne ki briew ka thain Pynursla kiba shah ktah ha kane ka jingjia, ki la pynpaw ba ki sngew duh jingkyrmen shibun ban ap khmih lynti ia ki jingiarap na ka sorkar namar ba kim ju ioh jingiarap kumba ki khmih lynti. Don lei lei kiba khlem ioh jingiarap ruh haduh kine ki sngi wat hadien ba la dep phah ia ka jingiarap sha ka sorkar ia ki jingjia mynshem snem bad ha kiwei ki snem.
Ka jingiarap na ka sorkar ka long kaba rit palat namar ka jingduh jong ki nongrep ka long da ki phew hajar hynrei ki ioh tang da ki spah ne tang shi hajar eiei bad kam iahap satia bad ka jingjulor.
Ka rukom khein ka sorkar ia ka jingjulor ka long ka bym iahap eiei namar ba ka long kaba rit palat. Bun ki ong ba ka jingleh ka sorkar, ka pyni ba kam don kano kano ka jingshim khia ia ka rep ka riang katba ia kiwei ki jylla, ka sorkar ka shim khia bha ia ki nongrep.
Phi don ban ong eiei?