15 tylli ki elekshon nong synshar shnong, ong ka KHADC

Shillong:U Executive member jong ka Khasi Hills Autonomous District Council (KHA DC) u bah Jambor War, u la iathuh ba ha kine ki sngi ban wan na ka liang kane ka tnad kan hap ban pynlong ia ki 15 tylli ki ilekshon ban jied ia ki khlieh nongsynshar, hynrei na ka daw jong ka COVID-19 la hap ban pynsangeh noh.

Haba kren bad ki lad pathai khubor na ka liang u bah Jambor u la ong ba ka KHADC ka la weng noh ia ka jingbthah ban pynsangeh ban pynlong ilekshon bad ia ki ilekshon ha ki hima bapher bapher kin sdang noh ban pynlong ha u bnai Naiwieng ban wan.

U la iathuh ba ki hima kiba la hap ban pynlong noh ia ki ilekshon ki long ka Hima Sohbar, Hima Mawmluh, Elaka Umniuh Tmar bad ka Hima Mawbeh ia kine ki hima kin pynlong noh ha u bnai Naiwieng 2021.
U la ong ruh ba na ka liang kine ki hima la dep ban pynbiang lut nadong shadong ia ki kot ki sla bad kaba sah mynta kan long sa tang ban pynbna ia ka tarik ban pynlong ilekshon.

U la iathuh ruh ba ia kiwei ki hima, la bthah ba kin phah noh ia ki kyrtong jong ki nongthep vote hapoh ka hima, ha ka ba na ka liang jong ka KHADC kan pynsted ia ka jingpynlong ia ka ilekshon ha ki hima bapher bapher khnang ba ki hima kin ioh noh ia ki khlieh nongsynshar kiba pura.