15 tin kurup umphniang ka KSU Nongmynsong

Shillong, naitung 16:
Ka Khasi Student Union (KSU) Nongmyn song unit ka la ioh kurup kumba 15 tin ka um phniang bam ka bym long shuh na kawei ka dukan kaba don ha iew Nongmyn song kaba kyrteng ka Sharma Enterprise. Ka seng ka la ioh ban kurup hadien ba ka la ioh ia ka jingujor na uwei u nongshong shnong kane ka thain uba la leit thied umphniang bam ba u la ioh da ka bym long shuh.
Ka seng hapoh ka jingialam jong u Organising Secretary u Khrawbor Kharkongor ki la khynra ia ka dukan ha kaba ki la sngew phylla ba la lap ba kine ki tin umphniang baroh kim don ia ka tarik ba mynno la pynmih bad mynno ka kut. U trai dukan u la iathuh ba u la thied ia kane ka umphniang na ka Jain Trading Company kaba don ha Paltan bazaar ha Iewduh.
Halot kane, ka seng ka la leit ia kynduh noh ia ka Inspector ba peit ia ka bam ka dih ka kong B.Mukhim ha ka ophis jong ka ha Lauchamiere.
Ha ka jingiakren bad kane ka inspector ka la bthah ba kan sa phah test ia katei ka umphniang sha Guahati bad lada lap ba ka long ka bym long katkum ba la ujor yn pynshitom ia ki katkum ka ain.