Shillong: Ha ka janmiet sngi saitjaiñ u nongialam jong ka FKJGP u bah Reginald Thabah u la ong ba ki don kumba 15 ngut eiei ki bar jylla kiba kynthup naduh ki khynnah rit, ki tymmen, ki rangbah kiba dang ia khreh shet khreh tiew harud surok ha Luckier Road ki thaiñ Garikhana ha ka por 6:30 baje mynmiet. U la ong ba u la kylli na ki naei ki ia wan ki jubab ba ki dei na Assam. U la iathuh ba u la pan ki kot ki sla jong ki ban pynshisha, hynrei kim don kumta u la sei phone ban pyntip pulit bad marsien sei ia ka phone u la ong ba ki la ia phet krad nangta bad ki la ia mareh lamwir sha ki thaiñ Lumdiengjri, hynrei ki pulit ka Lumdiengjri ki la ioh bat ia ki.
Ki tiar ki tar jong ki khar Assam kiba dang khreh shet kiba la shah bat ha ki pulit Lumdiengjri .
Katkum ka jingiathuh jong ki, u la ong ba ki la wan poi Shillong ha ka por 6:00 baje mynstep da kawei ka bos kaba shim T.900 tyngka ka bai kali 2 ngut briew. U la ong ba ha ka jingtohkit ki pulit ki lap ba ki dei na kawei ka shnong na ki thaiñ Assam. U la ong ba ki pulit ki la suba jur ba kitei ki briew ki lah ban dei kiba wan khnang shane sha Shillong na ka bynta ka Puja ban ioh tuh, ban ioh kloh pla briew naba dang ha u bnai ba la dep ki la iathuh ba ki pulit ki la ioh a ki briew kiba kum kitei bad la ioh kurup pisa, ki mobile phone ba ki la tuh.
Utei u nongialam FKJGP u la ong ba haba ka KSU ka pynieng ia ki khyrdop ban peit ia ki briew kiba wan na Assam , ka sorkar ka hukum ba kin weng noh namarba ki ong ka long be-aiñ bad ka sorkar ka la kular ban kan buh briew 24 kynta ha ka shisngi ban peit bad talasi ia ki kot ki sla jong ki briew ba wan nabar, “Hynrei balei kitei ki briew ki ioh rung da kaba suk, balei ka sorkar ka shu pynthame bad ka thok ia ngi ki Sengbhalang, balei ki briew kiba kum kitei ki dang io hban rung laitlan” u la ong. U bah Reginald u la ong ba lada ka long kumne ka sorkar ka dei ban aibor ha ki Sengbhalang bad ka KSU lem bad ka FKJGP ka kloi ban talasi hi ia ki briew ha ki khyrdop.