15%, na ka bhah kam, sha ki rit paid ka jylla, dawa ka MIMTF na U MR

Shillong:Ki jaitbynriew rit paid hapoh ka lama ka Meghalaya Indigenous Minority Tribes’ Forum (MIMTF), ki la dawa bhah lang 15 percent na ka sorkar jylla.

Kine ki kynhun rit riewlum kiba sah ha kane ka jylla ki long na ka jaitbynriew Rabha, Boro, Koch, Hajong bad ki Man ka Ri-lum Garo kila dawa ban pynrung bhah lang ia ki ha ka State Reservation Policy ka Jylla.
Ki la aiti ia ka dorkhas ha u Myntri Rangbah ka Jylla Conrad K Sangma ha kane ka sngi Balang ban kyrpad ia u ban ai ia ka bhah ba 15%, ha ka jingpynkylla thym mai ia ka Reservation Policy ka Jylla kaba dang pynkhreh mynta.

Kiba iasoi ha ka dorkhas ki long ka Meghalaya Hajong Welfare Association, Meghalaya Rabha Jatio Sewa Sangha (MRJSS), Meghalaya Koch Association, Meghalaya Boro Sahitya Sabha bad ka All Mann Tai Speaking Welfare Association.

Ki la pynpaw, ba ki dei ki nongshong shnong ba pura ka Jylla Meghalaya kumba long ki Khasi, Jaintia bad ki Garo.
“Watla ka bhah jong ngi ka long 5% hynrei ka jingshisha pat ka long tang 2% lada ym duna namar ngi hap ban iasam lang bad ki Scheduled Caste bad kiwei kiwei ki riewlum na shabar ka Jylla kum ki Naga, Mizo bad kiwei kiwei”, la ong kine ki kynhun jaitbynriew.