U Conrad K Sangma, myntri rangbah ka Meghalaya, ula iaid kjat mynta ka sngi, haduh 15 kilometre, na Kareli sha Gajera, ha ryngkat bad 80ngut kiwei pat ki nongiaid kjat ha Vadodara District jong ka Gujarat.
Ha ka 12tarik Lber 2021, U Narendra Modi, myntri rangbah, ula plie ia ka jing iaid kjat lane kaba ki ong Dandi March, na Sabarmati Ashram bad katei kan kut, ha ka 5tarik Iaiong 2021.
U Sangma, u ong ba kane ka jingiaid kjat, ka don jingmut bha, namar ka dei halor ka jing rakhe ia ka jingdap 75 snem jong ka jing laitluid ka India bad nangta sa ka mat jong ka jing ialeh pyrshah jong U Mahatma Gandhi, kaba la 91 snem mynshwa ban iakhun pyrshah ia ka sorkar phareng.
U Sangma, u leh burom ruh ia U Gandhi ha Kareli ha ryngkat bad u myntri khynnah ka Gujarat, U Vibhavari Dave. Ka Kareli, ka dei ka shnong, ha kaba U Gandhi, ula sah miet, ha ka jingiaid lynti jongu sha Dandi bad ka sorkar Gujarat, ka dang sumar bha ia ka iing trei, ha kaba ula sah U Gandhi.
“Ka Dandi March, ka la pyn khynniuh ia ka pyrthei, ha kaba ka sdang na ki 80ngut ki briew, hynrei, ka pynmih sha ki lak ngut kiwei pat, kiba mih ban iakhun pyrshah ia ka sorkar phareng” ong U Sangma.
Haba kren ha kito kiba iaid kjat lang ha Kareli, U Sangma, ula ong ba dei ban sngew sarong ia la ka jong ka jinglong nong India. “Kum ki nong India, ngi dei ban sngew sarong, ngi dei ban sngew sarong ia ka jing ialam jong U Gandhi bad kiwei de ki nongialam, kiba la pyn laitluid ia ka India”.
U Sangma, u sngewnguh ruh ia U Narendra Modi, myntri rangbahduh, uba la khot sngewbha ia baroh ki myntri rangbah, ba kin pynlong ia katei ka jing iaid kjat bad ula kren ruh halor ka jingthmu jong U Modi, ban kyntiew ia ka thain shatei lam mihngi, ha ka roi ka par.
“Ula peit kyrpang ia ka dong shatei mihngi, kaba la leh klet da ki bun bun snem. Mynta ha ka jing ialam jong U Modi, ka thain shatei lam mihngi, ka la nang kiew shajrong bad ula wan jngoh ia ka thain, la palat 15 sien bad ula bthah ruh ia ki myntri ka sorkar India ban wan jngoh ia ka thain man ka por. U myntri rangbahduh ula pynmih ia ka lad pynro kaba kham pher sha ka dong shatei mihngi” ong U Sangma.
U iathuh ruh ba ki don shibun na ka thain shatei lam mihngi bad kumjuh na Meghalaya, kiba la ialeh pyrshah ia ki phareng bad kitei ki long U Tirot Sing, Pa Togan Sangma bad U Kiang Nongbah. U iathuh ruh ia ka khana shaphang U Kiang Nangbah, u nong ialeh laitluid na Jaintia, ha kaba ula ong ba U Kiang, ula ong lada ka khlieh jongu, ka phai sha mihngi, kumta ka jaitbynriew, kan sa laitluid na ki phareng. “Haba la phasi ia U Kiang Nangbah, da ki British, ka khlieh jongu, ka phai sha mihngi, kumba ula iathuh lypa bad ngi ioh ia ka jing laitluid na ki British” ong u myntri rangbah. U Sangma, u ong ruh ba dei ban pyntip ia u paidlang ka India, ia ki nong ialeh laitluid, ba kynthup ia kiba na ka dong shatei lam mihngi bad kumjuh ia kiba na shathie jong ka India.
Phi don ban ong eiei?