Shillong:U CEM ka KHADC u ba long ruh u MDC jong ka Sohra Constituency, u bah Titostarwell Chyne u la kyntu ia ka Management jong ka MCCL ban pyllait noh ia ka tulop jong ki nongtrei kiba ym duna ia ka 400 ngut kiba la hap ban mih madan ban shah thngan ban dawa ia la ka hok jong ki.
Haba ia kren bad ki lad pathai khubor na ka liang jong u bah Titostarwell u la ong ba kumba la iohi, ba ka Management, shen kan sa khot ia ka Expression Of Interest ia kino kino ki Company ki ba kwah ban iatrei lang.
Na ka liang u CEM u la pynpaw ba ka jingleh jong ka Management ka lah ban long ka ba dei, hynrei ka management jong ka MCCL ka dei ban ioh ia ka jingmynjur jong kiba ia don bynta kum ka Mawmluh Elaka bad ka Hima Sohra.
U la ong ruh ba ha ka jingshisha ka jingleh jong ka sorkar jylla ka lah ban long ka ba bha tam, katba haba phai sha ka jingsngew jong u paidbah ka long da kumwei bad u ba bun na ka liang jong u paidbah ki dang kwah ba ka Sorkar kan dang pyntrei kam ia ka MCCL.
U la ong ruh ba ka MCCL kam dei ka project ba rim, ka dei ka project ba thymmai bad ka ei ka jingeh jong ka sorkar ban pyniaid ia kane ka project ba thymmai bad ka dei tang lyngba ka jingbym shim khia jong ki Management jong ka MCCl kaba la wan rah ia ka jingeh ia ki nongtrei. Na ka liang jong u bah Chyne u la pynpaw ia ka jingsngewkhia, ka long halor ki nongtrei kiba ym duna ia ki 400 ngut ki ba hap ban mih sha madan ban shah thngan na ka bynta ka hok jong ki, ha ka ba ki la duh ia ka tulop la 15 bnai.
Phi don ban ong eiei?