14tarik, ka jingialang paidbah ka Meghalaya School Welfare Dev Association

Shillong: Ka Association jong ka MSWDA-CB kaba dang shu seng da ki Secretary SMCs bad Head jong ki skul kan pynlong ia ka jingialang paidbah ha ka 14tarik Nailur 2019 ha ka por 11:00 baje mynstep ha Khasi National Durbar Hall, Mawkhar Shillong, ban pynshai bniah ia ki jingthmu (aims & objectives) jong ka Seng ha shuwa ba ki skul kin rung kum ki dkhot ba pura jong ka Association.

Ki katto katne ki jingthmu ba kongsan jong ka Seng ki long ban trei na ka bynta ka jingbha bad ka roi ka par jong ki skul bad ban kyntiew ia ka pule puthi naduh Pre-Primary haduh Secondary / Higher Secondary na ka bynta ki skul kiba la ioh jingiarap na ka Sorkar bad ki bympat ioh jingiarap, hynrei kiba la ioh jingbit na ka Education Department (Aided and Unaided permitted schools). Ka Seng kan buddien ruh ia ka National Education Policy (NEP) bad Meghalaya State Education Policy (MSEP). Kumjuh ruh kan iakren ia ka Sorkar halor ka jingeh jong ki Secondary Schools kiba lah don khamtam ban buddien iaka jingkren jong u Chief Minister haka Independence Day ba dang shudep.

Ka Seng kan dawa ban pyn ryntih iaka jingpyniaid skul khlem da pynhap bun kyrdan lane ia ki jingsiew ba iapher nuksa: kum ki Adhoc School bad ki 4th Teachers. Kumjuh ruh halor ka jingai jingtip jong ka skul lyngba ka UDISE la sngewdei ban don tang uwei u UDISE Code ha kawei ka skul kaba ha kajuh ka campus bad pyniaid da kajuh ka Management.

Shuh shuh ka Seng kan peit ruh ia ki jingeh kiba ktah kyllum ia ki skul baroh kum ka jingpynbha na ka bynta ka jingpyntreikam iaka Mid Day Meal (MDM) bad ia ki jingeh kiba ki nonghikai kiba iakynduh halor ki training kiba la phah da ki skul lyngba ka jingiarap pisa jong ka Sorkar. Ka Seng kan buddien ruh ia ka Improvement Exam kaba dang donkam ia ki in-service teachers.

Kumta halor kane la kyrpad ia baroh ki Presidents/Secretaries/Head bad Nongmihkhmat na ki skul kumjuh ruh ia kino kino ki Nonghikai kiba iakynduh jingeh halor ki Training/Improvement bad ia ki 4th Teachers ba kin sngewbha ban pyllait por khnang ban wan sha katei ka jingialang.