145 snem da ki phew hajar ki nonghikai sei ka Training Centre na Sohra

Shillong,21 Naiwieng:
Ka jaka ai jinghikai ia ki nonghikai, ka Teacher’s Training Centre ha Sohra ka la iaid lynti la kumba 145 snem eiei mynta, katei ka jaka ai jinghikai ka dei kaba la pyniaid da ka KJP Assembly. Katei ka jaka ai jinghikai ka la sei da ki hajar ngut ki nonghikai kiba tbit na katei ka jaka pule. Ka kong MB Khongwir Principal katei ka Centre, ka la iathuh ba la seng ia katei ka jaka hikai naduh u snem 1867 da u Rev.Huge Robert ,Welsh Mission bad katei ka jaka ai jinghikai kaba nyngkong eh ha ka jylla, ( ha kato ka por ka jylla jong ngi ka dang hap ha ka ka jylla Assam).
Naduh u 1867 la pynlong ka jaka ai jinghikai ia ki nonghikai ha Theological College Sohra namar ka jingbym don lad ban tei la ka jong ka jaka. Katba nang iaid ki sngi ki por katei ka jaka hikai ka la ioh lad ban tei la ka jong ka jaka hikai ha u snem 1982 bad ha u snem 1983 la sdang shisyndon la ka jong bad la pynkynriah noh na ka Theological Kolej.
Mynshuwa jan baroh ki nonghikai na kylleng ka ri-Khasi ki la poi lut sha katei ka jaka hikai ha Sohra ban pyntbit ha ki kam hikai jong ki hynrei mynta hadien ba la mih ki Diet bapher bapher ha katei ka jaka la wan ban shah hikai tang ki nonghikai na East Khasi Hills bad na Ri-Bhoi District. Ki nonghikaia ba la mih na katei ka jaka hikai kaba la seng da u Rev.H Robert ki dei ki nonghikai kiba tbit ha kaba ka Principal ka la iathuh ba ka resol jong ki na ka bynta u snem ba la dep ka long 98%, kata ruh ki la jana poi 100% hynrei dei namarba uwei u nonghikai u la shitom noh u khlem lah ban ialeh ia ka eksamin ‘hynrei ngi la jan kot 100 na ka 100’ ong i kong Khongwir.
Ka Principal ka la iathuh ruh ba katei ka jaka ai jinghikai kam hikai tang kumno ban hikai skul hynrei ka hikai ruh ia ki jaitkam bapher bapher ba ki nonghikai kin lah ban leit batai bad hikai sha ki khynnah pule jong ki , ki kam kum ka Socially Useful Projective Work,SUPW bad ki Creative Expression. Nalor kitei ki jinghikai la ju hikai ruh kumno ba kin im ha ka jinglong ba kynja mynsiem ban tip ia ka ktien u Blei. “3 tylli ki ‘H’ ki dei ki jinghikai ba kongsan kaba mut Head,Hand bad Heart “ ong ka Principal ka Cherra Teacher’s Training Centre,Sohra.